Prodıýserden zorlyq kórgeni týraly málimdegen jigittiń oqıǵasy tergeledi
ASTANA. KAZINFORM – Prodıýserden bala kezinde zorlyq kórgeni týraly málimdeme jasaǵan jigittiń oqıǵasy boıynsha tergeý amaldary bastaldy. Bul týraly QR Іshki ister mınıstriniń orynbasary Sanjar Ádilov málim etti.
Eske salsaq, áleýmettik jelilerde zorlyq týraly málimdeme jasalǵan beınejazba tarady. Beınejazba avtory Nurǵalı Nuǵmannyń aıtýynsha, ol bala kezinde prodıýserden zorlyq kórgen.
- Keshe ǵana buqaralyq aqparat quraldarynda jarııalanǵan habarlamadan keıin jedel sharalardy qabyldadyq. Almatydaǵy Polıtsııa departamentiniń baspasóz qyzmeti osy is-sharalarǵa qatysty túsinikteme berip úlgerdi, - dedi Sanjar Ádilov Parlament Májilisinde tilshiler suraǵyna jaýap bere otyryp.
Osy oraıda ol bul oqıǵa boıynsha quqyqtyq baǵa tergeý amaldary kezinde beriletinin aıtty.
- Qazirgi kezde tıisti tergeý jumystary bastalyp ketti. Barlyq derek tekseriledi. Málimdeme jasaǵan jigit qazir Qazaqstannan tys jerde, ıaǵnı Qytaıda júrgeni belgili. Ol Qytaıdan oralǵan soń, tıisti tergeý sharalary júrgiziledi, - dedi mınıstrdiń orynbasary.
Aıta keteıik, prodıýserden bala kezinde zorlyq kórgeni týraly málimde jasaǵan adamnyń derekterin polıtsııa tekserip jatqanyn jazǵan edik.
