Problemalyq kredıtter qory 222 múlkin satýǵa shyǵarady
NUR-SULTAN. QazAqparat – Problemalyq kredıtter qory 222 múlkin satýǵa shyǵarady, dep habarlaıdy QazAqparat tilshisi.
Atalǵan qor málimetinshe, qordyń jáne onyń enshiles uıymdarynyń 120-dan astam múlki satylǵan. Al qyrkúıekte 222 múlki satylymǵa shyǵarylady. Onyń 125-i jer telimi, 62-si kommertsııalyq jáne 35-i jyljymaıtyn turǵyn-jaı múlki. Qordyń satylatyn jer telimderin, jyljymaıtyn turǵyn-jaı men kommertsııalyq jyljymaıtyn múlikterin zańdy tulǵalarmen qatar elimizdiń azamattary da satyp ala alady. Satylatyn múlik Qazaqstannyń barlyq aımaqtarynda, ıaǵnı qalalarmen qatar aýyl aımaqtarynda ornalasqan. Saýdaǵa qoıylǵan nysannyń kóbi Almaty men Shyǵys Qazaqstan oblystarynda ornalasqan.
Almaty oblysynda aýdany 0,05-ten 470 gektarǵa deıingi 104 jer telimi satylady. Jer telimderiniń 91-i Talǵar aýdanynda, al 5-eýi Qapshaǵaı aýdanynda ornalasqan.
Shyǵys Qazaqstan oblysynda kóbinese turǵyn jáne kommertsııalyq jyljymaıtyn múlik satylymǵa shyǵarylmaq. Jyljymaıtyn turǵyn-jaı portfeli 16 birlikten turady. Onyń ishinde 6 páter Óskemen qalasynda, 4 páter jáne 4 úı Semeı qalasynda ornalasqan. 15 kommertsııalyq jyljymaıtyn múlik bar.
Aqmola oblysynda aýdany 0,5-ten 50 gektarǵa deıingi 7 jer telimderi satylady. 4 telim Tselınograd aýdanynda ornalasqan.
Atyraý oblysynda saýdaǵa aýdany 149-dan 243 sharshy metrge deıingi 4 jyljymaıtyn turǵyn-jaı múligi qoıyldy. Atyraý qalasynda 4, al Qulsary qalasynda 2 kommertsııalyq jyljymaıtyn múlik nysany satylady.
Qostanaı oblysynda aýdany 30 sharshy metrden bastalatyn ár túrli 5 kommertsııalyq jyljymaıtyn múlik satylady. Eń iri nysan – aýdany 2 960 sharshy metrdi quraıtyn 4 qabatty ákimshilik ǵımaraty. Sondaı-aq, satylymǵa jalpy aýdany 442 sharshy metrdi quraıtyn 4 jyljymaıtyn turǵyn-jaı usynylǵan.
Qaraǵandy oblysynda aýdany 53-ten 1 352 sharshy metrge deıingi 6 kommertsııalyq jyljymaıtyn múlik, sonyń ishinde Jezqazǵan qalasyndaǵy 4 nysan satylady.
