Problemaly kredıtter boıynsha servıstik ınstıtýt qurylady
«Zań jobasynda servıstik kompanııalar ınstıtýtyn qurý kózdeledi. Olar ınvestorlarǵa problemaly kredıtterge qyzmet kórsetý jáne basqarý qyzmetterin iske asyrady. Servıstik kompanııalar ınstıtýtyn damytý - strestik aktıvterdiń ótimdi naryǵyn qurý úshin qajetti jaǵdaı jasaıdy», - dedi M. Ábilqasymova.
Onyń aıtýynsha, servıstik kompanııalar aktıvterdi senimgerlik túrde basqarady, óndirip alýdyń jeke strategııasyn ázirlep iske asyrady jáne strestik aktıvterdiń ıelerine basqa da qyzmetter kórsetedi
«Servıstik kompanııalardyń fýnktsııalaryn tıisti tájirıbesi men quzyreti bar bankterdiń strestik aktıvterdi basqarý jónindegi enshiles uıymdaryna jáne kollektorlyq agenttikterge berý usynylady. Zańǵa táýeldi norma aıasynda servıstik kompanııalar úshin kapıtaldyń mólsheri, naryqtaǵy jumys tájirıbesi, minsiz iskerlik bedeliniń bolýy sekildi joǵary talaptar belgilenedi», - dediń agenttik basshysy.
Agenttik belgilengen talaptarǵa sáıkes keletin servıstik kompanııalardyń tizilimin júrgizip, olar týraly aqparatty óziniń ınternet-resýrsynda ornalastyrady.
«Bul qaryz alýshylardyń quqyqtaryn qorǵaýdyń qosymsha tetigin qamtamasyz etýge múmkindik beredi. Sebebi atalǵan uıymdar Agenttiktiń retteý quzyryna jatady», - dedi Mádına Ábilqasymova.
Atap aıtqanda, bul qujat aıasynda bankterdiń jáne mıkroqarjy uıymdarynyń strestik aktıvterin jeke ınvestorlarǵa satý quqyǵy beriledi.
Budan buryn habarlanǵandaı, 2016 jyldan bastap bank sektoryn qalypqa keltirý boıynsha qabyldanǵan sharalar nátıjesinde 6,7 trln teńge somasyndaǵy strestik aktıvter esepten shyǵaryldy. 2022 jylǵy 1 qańtardaǵy jaǵdaı boıynsha strestik aktıvter mólsheri 2,3 trln teńgeni nemese bank júıesi aktıvteriniń 6 paıyzyn qurady.
