Problemalyq toǵyz JEO qyzyl aımaqtan shyǵaryldy – Energetıka mınıstrligi

ASTANA. KAZINFORM – JIBEK JOLY radıosynyń «V kontekste» tok-shoýynda Energetıka mınıstrligi Memlekettik energetıkalyq baqylaý jáne qadaǵalaý komıtetiniń Elektr jáne jylý energııasyn óndirý stansalaryn qadaǵalaý departamentiniń basshysy Ashat Jaqypov jylý berý maýsymyna daıyndyq týraly baıandap berdi.

Baıandamashy ótken jylytý maýsymynan beri toǵyz JEO-nyń qyzyl aımaqtan sary aımaqqa ótkizilgenin atap ótti. Taǵy 10-y táýekel aımaǵynda qalyp otyr. Bul rette JEO-lardaǵy jabdyqtardyń tozýy 61%-ǵa deıin tómendetildi.

— Bizde jalpy 37 JEO bar. Biz olardy krıterııler boıynsha bóldik. Onyń 19-y qyzyl aımaqta, 11-i sary aımaqta, jeteýi jasyl aımaqta boldy. Qyzyl, bylaısha aıtqanda problemalyq aımaqtaǵy osy 19 JEO-ǵa basa nazar aýdaryldy. …Máselen, tozý deńgeıi, ıaǵnı bizdiń jabdyqtar, ózderińiz biletindeı, ótken ǵasyrdyń 1960 jyldary shyǵarylǵan. Tıisinshe, olar jyl saıyn tozyp keledi. Biraq jóndeý kompanııasynyń arqasynda biz jalpy tozýdy 61 paıyzǵa deıin tómendettik. Ol 64 paıyz bolǵan. Osy 19 JEO-nyń toǵyzyn ótken jylytý maýsymynyń sońyna qaraı sary aımaqqa aýystyrdyq, — dep baıandady Ashat Jaqypov.

Onyń aıtýynsha, Semeı, Temirtaý, Petropavl, Aqtaý, Pavlodar, Stepnogorsk, Oral, Qyzylorda, Arqalyq, Taraz sııaqty qalalardaǵy elektr nysandary qyzyl aımaqta qalyp otyr.

Energetıka mınıstrligi ókiliniń baıandaýynsha, qazir bul ýchaskelerde josparly jumys júrgizilip jatyr jáne olar kelesi jyldyń basynda sary aımaqqa aýystyrylýy múmkin.

Baıandamashy óńirlerdiń kómirmen qamtamasyz etilýine qatysty saýalǵa da jaýap berdi.

— Sharýashylyqtar men kommýnaldyq qyzmetterge qajetti jyl saıynǵy 7,4 mln tonna kómirdiń shamamen 4,5 mln tonnasy saqtalyp otyr. Bul jalpy normanyń 62 paıyzy. Jeke sharýashylyqtarǵa jetkizýde eshqandaı úzilis bolmaıdy, — dedi Ashat Jaqypov. 

Aıta ketelik Astana ákimdigi JEO-lardy antıdronmen jabdyqtaýǵa bıýdjetten aqsha bólmeıtin boldy.