Problemaly nysan salymshylarynyń 90% baspanaly boldy – Jeńis Qasymbek

ASTANA. KAZINFORM – Astana qalasynyń ákimi Jeńis Qasymbek qurylysy uzaqqa sozylǵan turǵyn úılerge qatysty Úkimette esep berdi.

«Ótken jyldyń basynda elordada 16 problemalyq nysan boldy. Bul 32 turǵyn úı, ıaǵnı 4 myńnan astam úlesker. Búginde olardyń 90% baspanaly boldy. Qalǵan 484 otbasy bıyl maýsymnyń sońyna deıin páterleriniń kiltin alady. Qazir qalada 401 turǵyn úı salynyp jatyr», - dedi Jeńis Qasymbek Úkimet otyrysynda.

Elorda ákimi keltirgen statıstıkaǵa súıensek, byltyr qurylys jumystarynyń kólemi 14,9%-ǵa ulǵaıǵan. Onyń ishinde turǵyn úı qurylysy 58,1%-ǵa artyp, 3,8 mln sharshy metr baspana berildi.

Sondaı-aq, Jeńis Qasymbek qurylys jumystarynyń bıyl da sol qarqynda júrgiziletinin tilge tıek etti.

Eske sala keteıik, qazir Astanada 40 872 adam turǵyn úı kezeginde tur.

Aıta ketsek, búgin Úkimet otyrysynda G-Park kompanııasynyń elordada ruqsat qujattarynsyz 7 turǵyn úı salyp jatqany aıtyldy.