Probatsııa esebindegi qyzylordalyq sot zalynan qamaýǵa alyndy
QYZYLORDA. KAZINFORM – Qyzylorda qalalyq probatsııa qyzmetiniń esebinde 600-ge jýyq adam bar.
Jýyrda sonyń biri sot qaýlysymen bas bostandyǵynan aıyrylyp, sot zalynan qamaýǵa alyndy. Qyzylorda oblystyq qylmystyq atqarý júıesi departamentiniń málimetinshe, ol Qylmystyq kodekstiń 188-baby 3-bóliginiń 3-tarmaǵymen kináli dep tanylyp, 3 jyl merzimge bas bostandyǵy shektelgen.
- Probatsııa esebine alynǵannan keıin mamandar oǵan sot belgilegen mindetterdi oryndaý tártibin, jazany óteý talaptary men probatsııa qyzmetine tirkelýge kelý ýaqytyn túsindirgen. Alaıda sottalǵan azamat belgilengen mindetterdi oryndamaı, jazany óteý kezeńinde ózin teris jaǵynan kórsetken. Atap aıtqanda, probatsııa qyzmetine tirkelý úshin belgilengen kúnderi birneshe ret sebepsiz kelmegen. Sonymen qatar tekserý barysynda turǵylyqty mekenjaıynda bolmaǵan. Probatsııa qyzmeti tarapynan birneshe ret eskertý jasalǵanyna qaramastan, tıisti qorytyndy shyǵarmaǵan. Osyǵan baılanysty qujattar jınaqtalyp, sotqa bas bostandyǵyn shekteý jazasyn bas bostandyǵynan aıyrý jazasyna aýystyrý týraly usynys berildi. Qyzylorda qalalyq №2 sotynyń qaýlysymen sottalǵan azamattyń jazasynyń ótelmegen 2 jyl 23 kúni bas bostandyǵynan aıyrý jazasyna aýystyryldy. Ol sot zalynan qamaýǵa alyndy, - delingen habarlamada.
Buǵan deıin Mańǵystaýda probatsııa talaptaryn birneshe ret buzǵan sottalǵan qaıta qamaýǵa alyndy.
