Probatsııalyq baqylaýda júrgen aqtóbelikter qaıtarymsyz grantpen kásip bastady
Aqtóbe oblystyq QAJ departamentine qarasty Shalqar aýdandyq probatsııa qyzmeti jazasyn óteýshilermen jumys istep, olardyń kásip bastaýyna kómektesti. Úsh shalqarlyqtyń árqaısysy 584,4 myń teńge kóleminde qaıtarymsyz grant utyp, kásip ashty. Olar «Bastaý Bıznes» jobasy boıynsha «Kásipkerlik negizderi» kýrsyna oqytady. Aı saıyn 16 myń teńge shákirtaqy alyp, oqý kýrsy kezinde tájirıbe jınaqtaǵan. Sóıtip bıznes jobasyn sátti qorǵady. Jazasyn óteýshiniń biri aǵashtan ydys-aıaq jasaıdy. Ol aǵash kesýge arnalǵan qural-jabdyq pen qajetti zattardy satyp aldy. Keıin áleýmettik jeli arqyly jarnama jasap, ústel jasaýǵa da tapsyrys qabyldady.
«Probatsııalyq baqylaýǵa alynǵan jazasyn óteýshiniń biri buǵan deıin aýlasyndaǵy shaǵyn tsehta plastıkalyq tereze jasaý kásibin ashyp, jumys istegen. Keıin sottalyp, jazasyn temir torda ótedi. Sol kezde qural-jabdyǵy eskirip, tabysy toqtap qalǵan. Bas bostandyǵynan aıyrý jazasy bas bostandyǵyn shekteýge aýysqan soń turalap qalǵan kásibin qaıta jandandyrdy. Ol ózi sekildi esepte turǵan sottalǵandardy jumysqa alýdy josparlap otyr. Al qaýipsizdigi ortasha túzeý mekemesinen bas bostandyǵynan shekteý jazasyna bosatylyp, probatsııalyq baqylaýǵa alynǵan taǵy bir sottalǵan turǵyn vokzal mańynda ornalasqan fastfýd taǵamdaryn daıyndaıtyn shaǵyn dúńgirshekte doner daıyndaıdy. Ol 584 myń teńgelik qaıtarymsyz grantqa qural- jabdyqtardy satyp aldy. Qazirgi ýaqytta kásibin ashqan sottalǵandardyń tártibi jaqsy»,- deıdi Shalqar aýdandyq probatsııa qyzmetiniń aǵa ınspektory Aqgúl Aıymbetova.
