«Probatsııa týraly» derbes zań jobasyn ázirleý qajet - Májilis

ASTANA. QazAqparat - Búgin Májilistiń Zańnama jáne sot-quqyqtyq reforma komıteti Іshki ister mınıstrliginiń Qylmystyq-atqarý júıesi komıtetimen jáne Ortalyq Azııadaǵy Halyqaralyq túrme reformasymen (PRI) birlesip, Qazaqstan Respýblıkasyndaǵy probatsııa qyzmetin odan ári damytý máseleleri boıynsha saraptamalyq kezdesý ótkizdi. Basqosý negizinen Elbasy aıqyndaǵan Ult josparynyń 33-shi qadamyn júzege asyrý máseleleri talqylanady. Bul týraly Májilistiń baspasóz qyzmetinen habarlandy.

Eske salaıyq, Qazaqstanda probatsııa qyzmeti 2012 jylǵy aqpan aıynda «Qazaqstan Respýblıkasynyń keıbir zańnamalyq aktilerine probatsııa qyzmeti máseleleri boıynsha ózgerister men tolyqtyrýlar engizý týraly» zańyna sáıkes engizilgen bolatyn. Al jańa Qylmystyq jáne Qylmystyq-atqarý kodeksterinde sottalǵandardyń bostandyǵyn shekteýge, bas bostandyǵynan aıyrý oryndarynan shartty túrde merziminen buryn bosatylǵandarǵa qatysty probatsııalyq baqylaý belgileý jáne sot olarǵa qatysty ákimshilik qadaǵalaý belgilegen bosatylǵan adamdardyń áleýmettik-quqyqtyq kómek alýyna járdem kórsetý kózdelgen. «Álemdik tájirıbede probatsııanyń tórt (sotqa deıingi, sharttyq-úkimdik, penıtentsıarlyq jáne postpenıtentsıarlyq) satysynyń bar ekendigin atap ótý kerek. Búgingi kúni Qazaqstanda probatsııanyń sharttyq-úkimdik jáne postpenıtentsıarlyq satysy jumys isteıdi. Atalǵan shara barysynda Qazaqstandaǵy probatsııa ınstıtýtyn damytýdyń perspektıvasy talqylanyp, negizinen probatsııanyń barlyq satysy kózdeletin «Probatsııa týraly» derbes zańdy ázirleý qajettiligi týraly máseleler kóterildi», - delingen baspasóz baıanynda. Sharaǵa Májilis depýtattarynan bólek Halyqaralyq túrme reformasy uıymynyń ókilderi, Joǵarǵy Sottyń, Bas Prokýratýranyń, Densaýlyq saqtaý jáne áleýmettik damý mınıstrliginiń, jergilikti atqarýshy organdardyń qyzmetkerleri, sondaı-aq halyqaralyq sarapshylar qatysty.