Probatsııa qyzmetkeriniń telefonyna birlik salǵan azamatsha aıyppul tóledi
Bul oqıǵa Qyzylorda qalasynda boldy. Probatsııa baqylaýynda júrgen azamatsha qalalyq probatsııa qyzmetkeriniń uıaly telefon nómirine 4700 teńge birlik salǵan. Ol zańsyz syıaqy bolyp tabylady. Bul jóninde probatsııa qyzmetkeri azamatshanyń is-áreketi týraly ózindik qaýipsizdik qyzmetine baıandaǵan. Nátıjesinde zańsyz syıaqy boıynsha tıisti hattama toltyryldy. Hattama Qyzylorda oblysynyń memlekettik qyzmet isteri jáne sybaılas jemqorlyqqa qarsy kúres departamentine joldandy.
«Laýazymdy tulǵaǵa zańsyz syıaqy bergen azamatshaǵa QR Ákimshilik quqyq buzýshylyq kodeksiniń 676-babyna sáıkes hattama toltyryldy. Oǵan sot qaýlysymen 353500 teńge kóleminde aıyppul salyndy. Aıta ketý kerek, memlekettik fýnktsııalardy oryndaýǵa ýákilettik berilgen qyzmetkerge nemese oǵan teńestirilgen adamǵa kólemi 2 AEK (5050 teńge) kórsetkishke deıingi aqsha, baǵaly qaǵazdar, múlik nemese qyzmet kórsetý zańsyz syıaqy bolyp tabylady. Al, shyǵyn kólemi odan asqan jaǵdaıda ol para bolyp tabylady», - dep málim etti oblystyq memlekettik qyzmet isteri jáne sybaılas jemqorlyqqa qarsy is-qımyl departamentiniń bas mamany Murat Ysqaqov.
Jyl basynan beri Qyzylorda oblysynda zańsyz syıaqy berý boıynsha 4 ákimshilik is qozǵalǵan. Nátıjesinde olarǵa 1414000 teńge aıyppul salynǵan.