Probatsııa ınspektoryna 5 myń teńge para usynǵan azamat bir aıǵa qamaldy

TARAZ. QazAqparat – Jambylda probatsııa qyzmetiniń ınspektoryna bes myń teńge kóleminde para usynǵan azamat ustaldy, dep habarlaıdy QazAqparat tilshisi, - dep habarlaıdy QazAqparat tilshisi.

Jambylda probatsııa qyzmetkerine para berý jaıtynyń joly kesildi. QR QK 188-babynyń 1-bóligi 1-tarmaǵy boıynsha kináli dep tanylyp, eki jyl alty aı merzimge bas bostandyǵyn shekteý jazasy taǵaıyndalǵan 29 jastaǵy jambyldyq azamat probatsııa qyzmetkerine para berýge oqtalǵan. Bul týraly Qylmystyq-atqarý júıesi departamenti habarlady.

Ol aram oıyn júzege asyrý maqsatynda Taraz qalalyq №1 probatsııa qyzmeti bólimi basshysynyń mindetin atqarýshy Oljas Bektaevqa tártiptik jaýapkershilikke tartpaýyn ótinip, para retinde bes myń teńge kóleminde aqshalaı qarajat berýge nıet bildirgen.

Oryn alǵan oqıǵaǵa baılanysty probatsııa qyzmetkeriniń ınspektory sottalǵan azamattyń aram oıyn basshylyqqa habarlady. Osylaısha, departament qyzmetkerleri jemqorlyq deregine nóldik tózimmen qaraıtynyn taǵy bir márte dáleldedi.