Pro Team Astana veloklýby ıtalıandyq Fabıo Arýmen kelisim-shart jasasty
ASTANA. 9 tamyz. QazAqparat - Pro Team Astana veloklýby men ıtalıandyq jas veloshabandoz Fabıo Arý arasyndaǵy kelisim-shart aǵymdaǵy jyldyń 1 tamyzynda kúshine enip, 2013-2014 jyldardaǵy maýsymdarda jalǵasyn tabady.
Astana jeıdesin kıgen jas talanttyń debıýti Kolorado joldarynan bastalmaq.
Fabıo Arý 1990 jyly týylǵan, 2007 jyldan bastap áýesqoı retinde jarys jolyn bastap, qazirdiń ózinde tańdaı qaqtyrarlyq chempıondyq ataqtarǵa qol jetkizip úlgergen. Atap aıtsaq, Giro della Valle d'Aosta-da qatarynan eki ret jeńis, Giro delle Valli Cuneesi jáne Trofeo Toscana Terra di Ciclismo jarystarynda birinshi oryn, al Giro-Bio 2012 saıysynda ekinshi oryndy enshiledi.
Komanda menedjeri Djýzeppe Martınellıdiń aıtýynsha, Fabıonyń bolashaq jeńisterge degen erik-jigeri men áleýeti óte joǵary. Ol keleshekte komandany órge súıreıtin sportshylardyń biri jáne biregeıi bolary sózsiz. «Fabıo kelesi jyly-aq Nıbalımen birge komandadaǵy negizgi oryndardyń birin alady. Tek Nıbalı ǵana emes, basqa da top músheleri Fabıoǵa ózderiniń bilgen-túıgenin aıtyp, tájirıbelerimen bólisip, tipti keıbir jeńiske jeteleıtin «qupııalaryn» da ashatynyna senimdimin», - deıdi ol.
Al Fabıonyń ózi bolsa, bıylǵy jetistikterine dán rıza ekendigin aıtady. «Men bıylǵy jyldyń qorytyndylaryna dán rızamyn. Onyń ústine bul jyl meniń Pro Team Astana-ǵa kelýimmen odan saıyn mańyzdy bola tústi. Munda, aty ańyzǵa aınalǵan Vınokýrovtyń komandasynda, talaı jeńisterge jetken basqa da komanda múshelerimen birge kóptegen belesterdi baǵyndyratynyma senimdimin. Endi mine, álemdegi eń myqty chempıondardyń biri Vınchentso Nıbalı da osy komandaǵa resmı túrde qosylyp jatyr. Munyń barlyǵy men úshin óte mańyzdy. Ózime artylǵan senim men jaýapkershilikti barymdy salyp aqtaýǵa tyrysamyn», - deıdi shabandoz.
