Prıton ustaý men jeńgetaılyq aýyr qylmys sanatyna jatqyzylmaq

ASTANA. KAZINFORM – Prıton ustaý men jeńgetaılyq aýyr qylmys sanatyna jatqyzylmaq. Mundaı túzetý Májilistiń jalpy otyrysynda qaralyp jatqan «Adam saýdasyna qarsy is-qımyl týraly» zań jobasyna ilespe qujatta kózdelgen.

Іshki ister mınıstri Erlan Sádenovtiń aıtýynsha, zań jobasyna 2 ilespe qujat bar. Onyń birinshisi - «Birqatar zańnamalyq aktilerge ózgerister men tolyqtyrýlar engizý týraly». Osy ilespe zań jobasy aıasynda Qylmystyq kodekske «adam saýdasymen baılanysty qylmystar» uǵymy engiziledi. Jasaý tásilderi boıynsha «adamdy qanaý» uǵymy keńeıtiledi.

«Qylmystyq kodekstiń 309-babynyń 2-bóligi, ıaǵnı «prıton ustaý jáne jeńgetaılyqty» «ınternet jelisi arqyly» jasaý degen jańa saralaý belgisi kózdeldi. Osylaısha, bul qylmys aýyr sanatqa jatqyzylady», - dedi mınıstr.

Munan bólek, onyń sózine qaraǵanda, Qylmystyq-protsestik kodekste jábirlenýshiniń áleýmettik arnaýly qyzmetter alýǵa quqyǵy kózdeldi. Bul rette olardy osy quqyqtary týraly habardar etý boıynsha tergeýshilerge mindetter júkteldi.

«Budan basqa, «Neke jáne otbasy týraly» kodekste: laýazymdy adamdarǵa balalar qaldyrylǵan jaǵdaıda, olar bul týraly prokýratýraǵa habarlaý mindeti bekitildi. Atap aıtqanda, prııýtter, balalar úıleri jáne basqa da uıymdardy qamtıdy. «Jábirlenishýlerge ótemaqy qory týraly» Zańǵa qosymsha úsh qylmys túri, ıaǵnı qanaý maqsatynda urlaý, bas bostandyǵynan zańsyz aıyrý, jáne jezókshelikpen aınalysýǵa tartý qylmystary boıynsha qurbandarǵa ótemaqy tóleý múmkindigi engizildi», - dedi Erjan Sádenov.

Sonymen qatar ol ákimshilik quqyq buzýshylyq týraly kodekske ózgerister engiziletindigin aıtty.

«Bul jerde balalardy ózderine qaldyrǵany týraly habarlamaǵany úshin medıtsınalyq uıymdardyń, prııýtterdiń, balalar úıiniń qyzmetkerlerine qatysty jaýapkershilik kózdelip jatyr», - dedi ol.

Talqylaý barysynda Májilis depýtattary negizgi zań jobasy men oǵan ilespe 2 zań jobasyn birinshi oqylymda maquldady.