Prıozerskidegi uzaqqa sozylǵan qurylys qaıta jandandy
Nysandaǵy jumystar qymbattaýǵa baılanysty birneshe jylǵa toqtatyldy. Qazir joba-smeta qujattamasy túzetildi, Jumyspen qamtýdyń jol kartasy - 2021 boıynsha osy jyldyń sońyna deıin nysandy aıaqtaýy tıis merdiger anyqtaldy. Qurylys tehnologııasyna sáıkes, tazartýdan keıin káriz tazartý qondyrǵysyna keletin sýdy ekinshi ret qoldanýǵa bolady. Jobany iske asyrý 33 jańa jumys ornyn qamtamasyz etedi.
Oblys ákimine qalanyń jylý berý maýsymyna daıyndyǵy týraly da baıandaldy. Jeńis Qasymbek josparly jóndeý jumys bastalǵan qazandyqty baqylap qaıtty. Protsess barysynda mamandar júıeniń tıimdiligin arttyratyn qosalqy jabdyq – ekonomaızerlerdi jóndeý qajettiligin anyqtady. Oblys basshysyna qarjylandyrýǵa kómek surap júgindi. Jabdyqty qalpyna keltirýge 104 mıllıon teńge qajet. Jeńis Qasymbek bul máseleni pysyqtaýdy tapsyrdy.
Sonymen qatar, oblys basshysyna qalanyń syrtqy ózgeristeri týraly da aıtyldy. Mysaly, «Jeńis» býlvary qalaı abattandyrylyp jatqany kórsetildi. Kóshe «Jumyspen qamtýdyń jol kartasy» baǵdarlamasy boıynsha retke keltirilýde. Gúlzar qala turǵyndarynyń demalýy úshin barynsha yńǵaıly etip qaıta qalypqa keltiriledi. Munda jaryqtandyrý, shaǵyn sáýlet nysandary, oryndyqtar ornatylady, kógaldandyrylǵan aımaqtar kóbeıedi.
Prıozersk qalasynda kóp qabatty úılerdiń qasbeti men shatyryn jóndeýge, aýlalardy abattandyrýǵa bıýdjetten qarajat bólindi, olardyń tek úsheýin retke keltirý ǵana qaldy. Qalǵan 26-sy ótken jyldary jóndeldi.
Al qalada kezekte turǵandar úshin 45 páterlik bes qabatty úı salyna bastady.
Jumys sapary barysynda oblys ákimi qalalyq emhanadaǵy vaktsınatsııa ortalyǵyna da bardy. Búgingi kúni koronavırýs ınfektsııasyna qarsy 750 Prıozersk turǵyny tolyq egildi, vaktsınanyń birinshi komponentin 1 929 adam aldy.
