Prıozerskide súńgýir-qutqarýshylardy daıarlaý boıynsha halyqaralyq jıyn ótip jatyr
Sharanyń ashylý rásimine QR Tótenshe jaǵdaılar birinshi vıtse-mınıstri Ibragım Kúlshimbaev pen Qaraǵandy oblysynyń basshysy Jeńis Qasymbek qatysty.
Іs-shara 24 mamyr men 5 maýsym aralyǵynda Halyqaralyq Azamattyq qorǵanys uıymynyń jáne tótenshe jaǵdaılar ortalyǵynyń qoldaýymen ótedi. 10 kún ishinde Qazaqstan, Reseı, Qyrǵyz Respýblıkasy TJM nusqaýshy-mamandary tájirıbe men daǵdylarmen bólisedi, kásibı máselelerdi talqylaıdy jáne sheberlikterin shyńdaıdy.
Trenıngke qazaqstandyq jedel-qutqarý jasaqtarynyń 35 qutqarýshysy qatysýda.
«Reseı men Qyrǵyz Respýblıkasynyń TJM áriptesterine súńgýirlerdi daıyndaýǵa kómekteskeni úshin alǵysymdy bildiremin. Úzdik tájirıbe men bilim almasý árqaısymyz úshin paıdaly bolady dep úmittenemin, óıtkeni bizdiń aldymyzda – adamdardy qutqarý mindeti tur», – dep atap ótti Ibragım Kúlshimbaev.
Jıyn orny jaıdan-jaı tańdalǵan joq. Prıozersk qalasynyń qutqarý kesheniniń Qazaqstan aýmaǵynda balamasy joq. Zamanaýı jabdyqtar apattyq-qutqarý jumystarynyń barlyq túrlerin tolyq júrgizýge múmkindik beredi.
Stantsııa 2014 jyldan bastap jumys isteıdi. Munda súńgýirlik jáne sýda qutqarýmen baılanysty barlyq qurylǵylardyń jańa úlgileri, zamanaýı júzý quraldary bar. Tereń sý basseıni sýasty jumystaryn oryndaý daǵdylaryn pysyqtaýǵa, súńgýirlik quraldar men jabdyqtardy tekserýge jáne synaýǵa múmkindik beredi.
Oblys ákimi Jeńis Qasymbekke sý astyndaǵy túrli trenajerlarda súńgýirlerdiń áreketterin vıdeojúıe boıynsha qalaı qadaǵalaýǵa bolatyny kórsetildi. Bul jaǵdaıda sý astyndaǵy beıne túsirý jáne jaryqtandyrý júıesi qoldanylady.
Stantsııa sonymen qatar barokameramen jabdyqtalǵan. Qurylǵylar tek jattyǵýlar men biliktilik sabaqtary úshin ǵana emes, aǵyndy-dekompressııalyq kamera súńgýirlerdiń aýrýlaryn, onyń ishinde ókpe barotravmalaryn, ýlanýlardy emdeýge múmkindik beredi.
«Balqash kóliniń akvatorııasyndaǵy zamanaýı qutqarý kesheniniń aýmaǵynda sizderge qurlyqta jáne sýda avtomatızmge deıin oqyp, jumys isteýge múmkindik baryna qýanyshtymyn. Shomylý maýsymy bastalar aldynda bul asa qajet. Adam ómiri sizderdiń daıyndyqtaryńyzǵa, ózara is-qımyldaryńyzǵa jáne jedeldikterińizge baılanysty», – dep atap ótti aımaq basshysy.
Trenıng qorytyndysy boıynsha Qazaqstan TJM 24 súńgýiri biliktiligin arttyrady jáne olarǵa «mamandandyrý 1-2-shi tobynyń 3-shi synybynyń súńgýiri» sanaty, 10 súńgýirge olardy odan ári oqytýshy retinde tartý úshin súńgýirlik is nusqaýshylarynyń biliktiligi taǵaıyndalady.
