Prıozerskide adamdar turyp jatqan kópqabatty 8 úı qaýipti jaǵdaıda
PRIOZERSK. KAZINFORM – Qaraǵandy oblysyndaǵy Prıozersk qalasynda tehnıkalyq jaǵdaıy syn kótermeıtin segiz kópqabatty úı tirkelgen. Sonyń biri – 78 otbasy turatyn bes qabatty baspana. Jóndeý jumystary bıyl jazda bastalady dep josparlanǵanymen, ýáde oryndalmaı, turǵyndar áli de qaýipti úıde kún keshýde.
Qaladaǵy bes qabatty úıdiń biriniń irgetasy opyryp, qabyrǵalary qaqyrap, beton plıtalary qozǵalyp ketken. Mamandar júrgizgen tehnıkalyq saraptama úıge birinshi dárejeli qaýip bar degen qorytyndy shyǵarǵan. Jobalyq sheshim boıynsha, irgetasty bekitip, qabyrǵalardy metall beldeýlermen nyǵaıtý qajet.
Sonymen qatar shatyr men qasbetti de tolyq jóndeý kózdelgen. Biraq jaz boıy júrgizilýi tıis jumys áli kúnge bastalmaǵan.
Bul úıden úsh jyl buryn páter satyp alǵan turǵyn Bekzat Kenjebaeva baspananyń apatty jaǵdaıda ekenin keıin bilgenin aıtady.
– Terezelerimiz durys jabylmaıdy. Qysta úıge sýyq jel úrlep turady. Rezeńkelerin aýystyrdyq, biraq eshqandaı nátıje bolǵan joq. Sosyn ǵana qabyrǵalar qısyq bolǵandyqtan dep túsindirdi.
Al úıdiń apatty ekenin biz tek páterdi alǵannan keıin ǵana estidik, - deıdi Prıozersk qalasynyń turǵyny Bekzat Kenjebaeva.
Turǵyndardyń shaǵymynan soń jergilikti ákimdik arnaıy tehnıkalyq tekserý júrgizgen. Saraptama qorytyndysy úıdiń shuǵyl jóndeýdi qajet etetinin aıqyndaǵan. Degenmen, belgilengen merzimde jumys bastalmaǵany turǵyndardyń ashý-yzasyn týǵyzýda.
– Mamandar kelip, saraptama jasap ketti. Jóndeý júrgizemiz dep ýáde berdi, biraq áli kútýdemiz. Úıde ıis bar, qabyrǵalar kógerip ketken, tútin murjasy jumys istemeıdi. Terezeler synyp, eshqandaı jóndeý jasaı almaı otyrmyz, - deıdi Prıozersk qalasynyń turǵyny Baǵdat Júnisova.
Qalada mundaı apatty jaǵdaıda turǵan taǵy jeti kópqabatty úı bar. Búginde tórteýine qatysty jobalyq-smetalyq qujattama ázirlenip, memlekettik saraptamadan ótýde. Saraptama nátıjeleri maquldanǵan soń, bıýdjettik qarjynyń bólinýine qaraı jóndeý jumystary kezeń-kezeńimen júzege aspaq.
– Bul úıde 2015-2016 jyldary ǵımarat qurylymdaryn nyǵaıtý jumystary júrgizilgen bolatyn. Biraq ótken jyldan bastap turǵyndar jaryqtardyń qaıta paıda bolǵanyn aıtyp, shaǵymdana bastady. Qaıta saraptama nátıjesi boıynsha úıdiń aldyn ala apatty jaǵdaıda ekeni rastaldy. Oblystyq bıýdjet esebinen qarjy bólinip, merdiger uıymdy tańdaý jumystary aıaqtaldy, - dep málimdedá Prıozersk qalasy ákiminiń orynbasary Temirhan Aıdarhanov.
Al qalǵan úsh úıdiń tehnıkalyq ahýalyna baılanysty qujattar qazirgi tańda memlekettik saraptamadan ótip jatyr. Geologtardyń málimetinshe, Prıozersk Balqash kóline jaqyn ornalasqandyqtan, jerasty sýlarynyń tym joǵary deńgeıi úılerdiń irgetasyna keri áserin tıgizýde.
Qalada búginde shamamen 80 kópqabatty turǵyn úı bar. Olardyń deni ótken ǵasyrdyń 60-jyldaryna deıin salynǵan eski nysandar. Ýaqyt óte kele bul úıler tozyp, keshendi jańǵyrtýdy qajet etýde. Alaıda apatty baspanalarǵa qatysty naqty jumystar tek qarjylandyrýǵa baılanysty júrgiziledi. Al turǵyndar ázirge taǵdyryn tozyǵy jetken qabyrǵalarǵa tapsyryp, úmit pen qaýip arasynda ómir súrip jatyr.
Osyǵan deıin Prıozersk qalasynda káriz sýy on jyldan astam ýaqyt boıy tazartylmaı, ashyq dalaǵa tógilip jatqany jaıly habarlaǵan bolatynbyz.