Prıozersk turǵyndary jyly sýmen qamtý máselesin sheshýdi suraıdy
QARAǴANDY. QazAqparat - Qaraǵandy oblysy Prıozersk turǵyndary óńir basshysy Nurmuhambet Ábdibekovtyń eseptik kezdesýinde ystyq sýmen qamtý máselesin kóterdi.
«Prıozerskte bolǵanda arnaıy qazandyqqa baryp baıqaǵanmyn. Qalada ortalyqtandyrylǵan ystyq sýmen qamtý júıesi joq ekenin bilemin», - dedi oblys ákimi.
Ol bul máseleniń túıinin tarqatý úshin ýaqyt kerektigin aıtty.
«Máseleni sheshýge tyrysyp, tıisti sharalardy qolǵa aldyq. Jańa qazandyqty qurý boıynsha jobalyq-smetalyq qujat ázirlendi. Qazirgi ýaqytta ony qarjylandyrý máselesi keıinge shegerildi. Keıin jańa qazandyq salyp, ystyq sýmen qamtý máselesin túbegeıli sheshemiz», - dedi N. Ábdibekov.
