Prıozersk qalasyndaǵy turǵyn úılerge jylý berý máselesi 27 qańtarǵa deıin sheshiledi - TJM
ASTANA. 17 qańtar. QazAqparat /Aıdar Ospanalıev/ - Prıozersk qalasyndaǵy turǵyn úılerdi jylý júıesine qosý kestesi boıynsha 27 qańtarǵa deıin barlyq páterlerge jylý berilýi tıis.
Bul týraly búgin osy máselege baılanysty jýrnalıstermen arnaıy baspasóz-máslıhatyn ótkizgen Tótenshe jaǵdaılar salasy Apattyq-qutqarý qyzmetteriniń kúshteri men quraldary basqarmasynyń bastyǵy Alekseı Sovetov málim etti.
Onyń sózine qaraǵanda, Qaraǵandy oblysyna qarasty Prıozersk qalasynda osy ýaqytqa deıin jaısyz jaǵdaı qalyptasty. Atalmysh qalada barlyǵy 69 kópqabatty turǵyn úı bar. Olardyń 19-y 1990 jyldardan beri ortalyq jylý júıesine qosylmaǵan. «29 jeltoqsan kúni qalanyń jylý júıesinde oryn alǵan apattyń saldarynan 50 turǵyn úı jylýsyz qaldy. Apattyń saldarynan qaladaǵy 4 jylý qazandyǵynyń 1- ýi buzylyp, jylý júıesindegi temperatýra 39 gradýsqa deıin tómen túsip ketti. 30 jeltoqsan kúni arnaıy júrgizilgen jóndeý jumystarynan soń 4-qazandyq tolyq iske qosylyp, 50 turǵyn úı men 5 mektep jáne 4 balabaqshany qosqanda 45 ákimshilik ǵımaratynda jaǵdaı qalypqa keldi», - dedi basqarma bastyǵy.
Onyń málimetinshe, alaıda 2 qańtar kúni taǵy bir qazandyq isten shyǵyp, jylý júıesindegi temperatýra qaıtadan tómendep ketken. Qazirgi tańda aımaqta Tótenshe jaǵdaılar mınıstrliginiń jedel ókilderi jumys istep jatyr. «Olardyń málimetteri boıynsha, qaladaǵy barlyǵy 2 myń 408 páterdiń 479-na jylý áli berilmegen. Tótenshe jaǵdaılar salasynyń ókilderi jaǵdaıdy retteý úshin qoldan kelgenniń barlyǵyn jasaýda»,-dedi basqarma bastyǵy.
