Prıozersk qalasynda 45 otbasyna páter kiltteri tabys etildi

PRIOZERSK. QazAqparat - Prıozersk qalasynda kezekte turǵandar úshin «Nurly jer» baǵdarlamasy boıynsha salynǵan bes qabatty turǵyn úı tapsyryldy. 45 otbasy páter kiltin aldy, dep habarlaıdy QazAqparat tilshisi.

31 jastaǵy Aınur Asanova jeti jyl boıy turǵyn úıge kezekte turǵan. Ol eki balasyn jalǵyz tárbıelep otyr. Oǵan eki bólmeli páter bólindi.

«Jeti jyl buryn men kúıeýimnen aıryldym. Birneshe jyldar boıy balalarymmen birge baspana jaldap kelemiz. Aıyna 50 myńǵa páter jaldadym. Kommýnaldyq qyzmet aqysyn tóledim. Munyń bári otbasylyq bıýdjetke aýyrtpalyq saldy. Óz baspanań bolǵany naǵyz baqyt. Men óte rızamyn», – deıdi Aınur.

Turǵyn úı kópbalaly otbasylarǵa, múmkindigi shekteýli jandarǵa, tolyq emes jáne az qamtylǵan otbasylarǵa, jetim balalarǵa jáne azamattardyń basqa da áleýmettik osal toptaryna berildi.

«Jańa qonystanýshylardy quttyqtaımyn jáne olarǵa jańa páterlerde baqyt pen amandyq tileımin. Olardyń kópshiligi bul kúndi jyldar boıy kútti. Aldaǵy ýaqytta aýla aýmaǵyn abattandyrý jumystary júredi», – dedi Prıozersk qalasynyń ákimi Sapar Sataev.

Jańa turǵyn úı mańynda balalar oıyn alańyn jaılastyrý, oryndyqtar men qoqys jáshikterin ornatý, sondaı-aq aýlany jaryqtandyrý josparlanyp otyr.

Búgingi tańda Prıozersk qalasynda turǵyn úıge kezekte 360 adam tur.

Foto: gov.kz