Prezıdenttiń Japonııaǵa sapary: 60-tan astam ekijaqty qujatqa qol qoıyldy
ACTANA. KAZINFORM – Prezıdenttiń Japonııaǵa sapary aıasynda somasy 3,7 mıllıard dollardan asatyn 60-tan astam ekijaqty qujatqa qol qoıyldy. Bul týraly Aqordanyń baspasóz qyzmeti habarlady.
Prezıdent Qazaqstan Japonııa naryǵyna ýran, sırek kezdesetin metaldar jáne munaı jetkizetinin atap ótti.
- Saýda-ekonomıkalyq jáne ınvestıtsııalyq baılanysty jandandyrýǵa basa mán berý qajet. Byltyr ózara saýdanyń kólemi shamamen 2 mıllıard dollarǵa jetti. Qazaqstan Japonııa naryǵyna ýran, sırek kezdesetin metaldar jáne munaı jetkizedi. Japonııa – Qazaqstan ekonomıkasynyń negizgi ınvestorlarynyń biri. Onyń elimizge quıǵan qarjy kólemi 8,5 mıllıard dollardan asty. Qazaqstan uzaq ýaqyttan beri iri japon korporatsııalarymen tabysty qarym-qatynas ornatty. Biz elimizde eńbek etip jatqan Japonııanyń shaǵyn jáne orta kompanııalarynyń qyzmetine qoldaý kórsetip kelemiz. «Ortalyq Azııa – Japonııa» formatyndaǵy bıznes forýmynda ekijaqty baılanystardy jandandyryp, jańa ınvestıtsııalyq jobalardy iske asyrýda qajetti ýaǵdalastyqtarǵa qol jetkizetinimizge senimdimin. Japonııaǵa saparymnyń aıasynda 60-tan astam ekijaqty qujatqa qol qoıyldy. Onyń ishinde somasy 3,7 mıllıard dollardan asatyn kommertsııalyq kelisimder de bar, - dedi Memleket basshysy.
Aıta keteıik, 17 jeltoqsan kúni Qasym-Jomart Toqaev Japonııaǵa resmı saparmen bardy.
Qazaqstan Prezıdentin Tokıo qalasynyń Haneda halyqaralyq áýejaıynda Japonııanyń memlekettik syrtqy ister mınıstri Aıano Kýnımıtsý qarsy aldy.
Al 18 jeltoqsan kúni Prezıdent Qasym-Jomart Toqaevtyń qurmetine Imperator Narýhıtonyń atynan resmı qabyldaý ótti.
Prezıdent Qasym-Jomart Toqaev qazirgi ýaqytta Japonııada bilim alyp, túrli salada qyzmet etip júrgen Qazaqstan azamattarymen kezdesti. Memleket basshysy Japonııa sııaqty damyǵan eldiń tájirıbesin zerdeleý mańyzdy ekenin aıtty.
Sondaı-aq Qazaqstan Prezıdenti Japonııa Premer-mınıstriniń atynan Ortalyq Azııa elderi basshylarynyń qurmetine arnalǵan resmı qabyldaýǵa qatysý úshin Akasaka memlekettik saraıyna barǵan bolatyn.
Prezıdent Qasym-Jomart Toqaev «Ortalyq Azııa – Japonııa» dıalogynyń birinshi sammıtinde sóz sóıledi.