Qazaqstan-Japonııa: Tokıoda jalpy quny 3,7 mlrd dollardan asatyn kelisimderge qol qoıylady

ASTANA. KAZINFORM — Memleket basshysy Qasym-Jomart Toqaevtyń Japonııaǵa resmı sapary aıasynda qol qoıylatyn kommertsııalyq kelisimderdiń jalpy quny 3,7 mıllıard dollardan asady. Prezıdent osy maqsatta Tokıoda japonııalyq iri bıznes ókilderimen kezdesýler ótkizbek. Bul týraly Prezıdenttiń kómekshisi – Baspasóz hatshysy Rýslan Jeldibaı Telegram-arnasynda habarlady.

«Barlyǵy 40-tan astam qujatqa qol qoıý josparlanǵan. Kelisimder energetıka, jańartylatyn qýat kózderi, tsıfrlandyrý, taý-ken, kólik sekildi negizgi salalardy qamtıdy», dep jazdy R.Jeldibaı.

Qazaqstan tarapynan qujattarǵa «Samuryq-Qazyna», KEGOC, «Qazatomónerkásip», «Taý-ken Samuryq», «Qazposhta», «Qazaqstan temir joly» kompanııalary, al Japonııa tarapynan Marubeni, MUFG Bank, Mitsubishi Heavy Industries, Hitachi Energy, Toshiba, JOGMEC, Kansai Electric Power jáne RIKEN KOGYO sııaqty kompanııalardyń ókilderi qol qoıady.

Sonymen qatar Rýslan Jeldibaı Prezıdenttiń Japonııaǵa sapary aıasynda ózge de resmı kelissózder men iskerlik kezdesýler ótkizý josparlanyp otyrǵanyn jetkizdi.

Eske sala ketsek, keshe Qasym-Jomart Toqaev Japonııaǵa resmı saparmen bardy. 

Al Japonııa elshisi Tokıonyń strategııalyq josparynda Qazaqstannyń róli artyp kele jatqanyn aıtty.