Prezıdenttiń Japonııaǵa resmı sapary mazmundy ári nátıjeli boldy - Rýslan Jeldibaı

ASTANa. KAZINFORM – Memleket basshysynyń Japonııaǵa resmı sapary mazmundy ári nátıjeli boldy. Bul týraly Qazaqstan Respýblıkasy Prezıdentiniń kómekshisi — Prezıdenttiń baspasóz hatshysy Rýslan Jeldibaı málimdedi.

Qasym-Jomart Toqaev Kúnshyǵys eliniń joǵary basshylyǵymen, jetekshi kompanııalardyń top-menedjerlerimen nátıjeli kelissózder júrgizip, Japonııada bilim alyp, eńbek etip júrgen qazaqstandyqtarmen kezdesti.

Qazaqstanǵa ınvestıtsııa tartý

Prezıdent japondyq iri kompanııalar jáne uıymdar jetekshilerimen kezdesýler ótkizdi.

Olardyń qatarynda Mitsui transulttyq saýda kompanııasy, Rakuten Group halyqaralyq tehnologııa konglomeraty, Sumitomo saýda-ınvestıtsııalyq korporatsııasy, mashına jasaý salasy boıynsha álemdegi iri korporatsııalardyń biri Komatsu, qurylys pen taý-ken tehnıkalaryn óndirýde jetekshi kompanııa sanalatyn Hitachi Construction Machinery, sondaı-aq Japonııanyń metall jáne energetıkalyq qaýipsizdik jónindegi agenttigi bar.

Kelissózderde ózara tıimdi yntymaqtastyq perspektıvasy talqylandy. Atap aıtqanda:

- ıadrolyq medıtsınany damytý; 

- asa mańyzdy mıneraldardy barlaý;

- logıstıka jáne tsıfrlandyrý;

- «jasyl» tehnologııalardy engizý, qurylys jáne taý-ken qural-jabdyqtarynyń óndirisi men servıstik qyzmet kórsetý.

Joǵary deńgeıdegi kezdesýler

 Imperator Narýhıto men Japonııa Premer-mınıstriniń bir kúnde qarsy alýy jáne iltıpat kórsetýi Memleket basshysynyń halyqaralyq qoǵamdastyqtaǵy bedeli zor ekenin baıqatady.

Japon dıplomatııasynda mundaı protokoldyq sharalardyń kezektese uıymdastyrylýy tańsyq jaǵdaı, sonymen qatar meımanǵa sheksiz qurmettiń belgisi retinde baǵalanady.

Budan bólek, Prezıdent Tokıo gýbernatorymen júzdesti.

Kezdesýde qala basqarý isinde Smart city tehnologııalaryn damytý jáne ınnovatsııalyq sheshimder engizý máseleleri qarastyryldy. Delegatsııa músheleri Qazaqstan men Japonııa astanalary arasyndaǵy ózara túsinistik jónindegi memorandýmǵa qol qoıdy.

Memleket basshysy Tokıodaǵy BUU ýnıversıtetinde dáris oqydy

Muny da erekshe yqylastyń kórinisi deýge bolady. Qasym-Jomart Toqaev dáriste qazirgi geosaıasat, halyqaralyq arenadaǵy orta derjavalardyń róli, jasandy ıntellekt mańyzynyń artýy jáne Birikken Ulttar Uıymyn reformalaýdyń qajettiligi sekildi negizgi máselelerge nazar aýdardy.

Prezıdent sý resýrstaryn basqarý isine arnaıy toqtaldy.

Qasym-Jomart Toqaev atalǵan salanyń ózektiligin aıta kelip, bul mindetterdi sheshý úshin UN Water halyqaralyq uıymyn qurý jáne Almatyda BUU ýnıversıtetiniń óńirlik fılıalyn ashý jóninde bastama kóterdi.

Memleket basshysy BUU ýnıversıtetinde Japonııanyń burynǵy Syrtqy ister mınıstri Erıko Kavagýchımen beıresmı kezdesý ótkizdi.

Prezıdent Japonııada eńbek etip júrgen otandastarymyzǵa da kóńil bóldi. Olarmen arnaıy júzdesip, emen-jarqyn áńgimelesti.

Sapar sońynda Qasym-Jomart Toqaev Ortalyq Azııa elderi basshylarymen birge «OA + Japonııa» formatyndaǵy birinshi sammıtke qatysty.

Memleket basshysy ózara tıimdi yntymaqtastyqtyń basym baǵyttaryna toqtaldy. Sonyń ishinde:

Qazaqstan Japonııamen birlesken jobalardy tabysty júzege asyrý úshin barlyq qajetti jaǵdaıdy jasaýǵa, qolaıly ınvestıtsııalyq klımat qalyptastyrýǵa daıyn;

Qazaqstan Japonııa Úkimetiniń Aqtaý portyndaǵy kedendik rásimderdi jetildirýge atsalysý týraly sheshimin quptaıdy;

Elimiz «jasyl» tehnologııalardy qoldana otyryp, dástúrli qýat kózin ıgerý jáne óńdeý jobalaryna japon tájirıbesin, ınnovatsııasy men ınvestıtsııasyn tartýǵa múddeli;

Qazaqstan Japonııamen birlesken Next-Generation SmartMining Plus jobasynyń iske qosylýyn qýattaıdy.

Bul bastama sırek kezdesetin elementter men basqa da asa mańyzdy mıneraldar óndirisin tsıfrlandyryp, ekologııalyq ornyqtylyqty arttyrady.

Budan bólek, Qasym-Jomart Toqaev ornyqty aýyl sharýashylyǵy salasynda japon ǵalymdarynyń jáne sarapshylarynyń qatysýymen zertteý platformasyn qurýdy, sondaı-aq elimizde Japonııa ýnıversıtetteri men bilim ortalyqtarynyń ókildikterin ashýdy usyndy.

Prezıdent JICA agenttiginiń Ortalyq Azııadaǵy sý problemasyn sheshýge qosqan úlesin atap ótti. Sý únemdeý tehnologııalaryn engizý, ǵylymı zertteý jumystaryn júrgizý, sý salasyn avtomattandyrý men tsıfrlandyrý jáne basqa da baǵyttarda kúsh biriktirip, tájirıbe almasýǵa shaqyrdy.

Memleket basshysy atom energetıkasyndaǵy yntymaqtastyqqa nazar aýdardy. Elimiz álemdik ıadrolyq otyn naryǵynda zor áleýetke ıe.

Osy múmkindikti Japonııanyń ozyq tehnologııasymen bir arnaǵa toǵystyrý atalǵan baǵyttaǵy tabysty yqpaldastyqqa kepil bolady.

Resmı sapardyń nátıjesinde jalpy quny 3,7 mıllıard dollardan asatyn 60-tan astam ekijaqty qujatqa qol qoıyldy.

Prezıdenttiń barlyq sheteldik sapary el ekonomıkasyna aıtarlyqtaı serpin beredi. Saparlar barysynda mıllıardtaǵan dollarǵa baǵalanǵan sheteldik ınvestıtsııa tartý jónindegi kelisimderge qol jetkizilip, tıisti sheshimder qabyldanady.

Sol arqyly taýar aınalymy men eksport ulǵaıa túsedi. Bul, ásirese otandyq óndirýshiler úshin erekshe mańyzdy. Sondaı-aq saparlar aıasynda strategııalyq mánge ıe nysandar ashylyp, on myńdaǵan jumys orny paıda bolady, iskerlik baılanystar nyǵaıa túsedi.

Vızasyz rejımdegi elderdiń qatary kóbeıip, Qazaqstan azamattaryna tıimdi jańa áýe reısteri iske qosylady.

Aıta keteıik, búgin Memleket basshysynyń Japonııaǵa jasaǵan resmı sapary máresine jetti. Bul jaı ǵana formaldy sapar emes, eki eldiń keleshek qarym-qatynasyn aıshyqtaǵan mańyzdy bastama boldy. Resmı qabyldaýlar deńgeıi, aýqymdy ekonomıkalyq kelisimder, joǵary deńgeıdegi kelissózder – bári qazaq-japon baılanysynyń jańa dáýiri bastalǵanyn kórsetkendeı. Osy oraıda Kazinform-nyń analıtıkalyq sholýshysy úsh kúndegi eleýli oqıǵalarǵa qatysty sarapshylar pikirin bilip, qos el qabyldaǵan sheshimniń astaryna úńildi.