Prezıdenttiń Tájikstanǵa saparynda tarıhı qadamdar bolady – sarapshy

Qazaqstan Prezıdenti Qasym-Jomart Toqaev 22-23 tamyzda memlekettik saparmen Tájikstanǵa barmaq. Sapar aldynda birqatar qujattarǵa qol qoıylatyny jaıynda boljamdar aıtylýda. Osy oraıda jańa kelisimder qaı baǵytta órbýi múmkin ekenin bilmekke QZSI bas sarapshysy Álııa Musabekovaǵa habarlasqan edik.

Sarapshynyń aıtýynsha, sapar aıasynda joǵary deńgeıdegi jáne keńeıtilgen úkimetaralyq formatta kelissózder ótedi. Sondyqtan ázirlenip jatqan qujattar paketiniń aýqymy keń.

– Bul sapardyń basty ereksheligi – Odaqtastyq qatynastar týraly shartqa qol qoıý. Bul tarıhı qadam eki el arasyndaǵy qarym-qatynastardy, seriktestikti, ózara is-qımyldy sapaly jańa deńgeıge shyǵarady. Táýelsizdik alǵannan beri Qazaqstan men Tájikstan dostyqqa berik, ózara tıimdi yntymaqtastyq baılanystyryp tur. Tájikstanda ishki turaqsyzdyq bolǵan kezde Qazaqstan gýmanıtarlyq jáne áskerı kómek kórsetti. Dýshanbe sarapshylary muny ylǵı aıtyp otyrady, – deıdi ol.

Sondaı-aq sarapshy qaýipsizdik máseleleri ekijaqty kún tártibinde mańyzdy bolyp turǵanyn tilge tıek etti. Qazaqstan men Tájikstan óńirdegi qaýipsizdiktiń ornyqty qurylymyn qalyptastyrý úshin birlesip jumys istemek.

– Qazaqstan Tájikstannyń úzdik 5 saýda-ekonomıkalyq seriktesiniń qataryna kiredi jáne negizgi ınvestorlardyń biri bolyp sanalady. Búginde Tájikstan - Ortalyq Azııadaǵy ekonomıkalyq ósimniń eń joǵary qarqyny bar memleket. 2023 jyly 8,3 paıyzdy qurasa, 2024 jyldyń basynda 8,2 paıyzdy ustap turdy. Ekonomıster mundaı jaqsy ósý dınamıkasyn altyn eksportynan túsetin kiristerdiń ulǵaıýymen, ınfraqurylymǵa memlekettik salymdardyń bolýymen baılanystyrady, – dep túıindedi Álııa Musabekova.

Buǵan deıin Memleket basshysy Qasym-Jomart Toqaev 22-23 tamyz kúnderi Tájikstan Respýblıkasyna memlekettik saparmen baratynyn habarlaǵan edik.