Prezıdenttiń «Taza Qazaqstan» bastamasyna qatysýshylar sany 7 mln adamnan asty
ASTANA. KAZINFORM — Prezıdenttiń «Taza Qazaqstan» bastamasyn júzege asyrý jumystary jalǵasýda, ol azamattardyń jańa ekologııalyq mádenıetin qalyptastyrý jáne jańa Konstıtýtsııadaǵy tabıǵatqa uqypty qaraý qaǵıdatynyń negizgi elementine aınaldy. Aýqymdy joba aýmaqtardy abattandyrý, qaldyqtarmen jumys isteý ınfraqurylymyn damytý jáne ekologııalyq aǵartý jónindegi keshendi sharalardy qamtıdy.
Jyl ótken saıyn Prezıdenttiń «Taza Qazaqstan» bastamasy aıasyndaǵy ekologııalyq is-sharalarǵa qatysýshylar sany da arta tústi. Eger 2025 jyly oǵan 6 mln adam qatysqan bolsa, osy jyldyń qańtar aıynan qazirgi ýaqytqa deıin 7 mln-nan astam azamat atsalysqan. «Taza Qazaqstan» bastamasyn júzege asyrý bastalǵannan beri eldi mekenderde 7 mln-nan astam aǵash, al memlekettik orman qorynyń aýmaqtarynda 1 mlrd-tan astam tuqym pen kóshet otyrǵyzyldy.
— Elimizde ekologııalyq sana qalyptastyrý, ekologııalyq bilim berý syndy baǵyttar jańa Konstıtýtsııaǵa engizildi. “Taza Qazaqstan” bastamasy tek senbiliktermen shektelmeıdi. Ol turǵyndardyń ekologııalyq sanasyn damyta túsýdi kózdeıdi, — dep atap ótti QR ekologııa jáne tabıǵı resýrstar vıtse-mınıstri Mansur Oshýrbaev.
Úkimettiń baspasóz qyzmeti málimetinshe, óskeleń urpaqtyń ekologııalyq bilimine jáne keri baılanysty tsıfrlandyrýǵa erekshe kóńil bólinip jatyr. 265 mektepke deıingi bilim berý mekemelerinde «Jasyl balabaqsha» baǵdarlamasy engizilgen, mektepterde 560 myńnan astam taqyryptyq synyp saǵattary ótkizilgen. TazaQazBot Telegram-arnasy iske qosylyp, ol arqyly eldi mekenderdiń aýmaǵyn abattandyrý máseleleri, sanıtarlyq jaǵdaıy jóninde 57 myńnan astam ótinish kelip tústi.
Aýmaqtardy sanıtarlyq tazartý aıasynda 9 myńnan astam ruqsat etilmegen qoqys úıindileri joıylyp, 3,8 mln tonnaǵa jýyq qoqys jınaldy. Búginde memleket qaldyqtar máselesin júıeli túrde sheshýge kóshti, olardy jınaýdan bastap tereń óńdeý jáne kádege jaratýǵa deıingi keshendi sharalardy qolǵa aldy. Mysaly, sheteldik ınvestorlardy tarta otyryp, Astana, Almaty qalalary men Jambyl oblysynda jalpy quny 300 mlrd teńgeden asatyn jáne qýaty táýligine 4,4 myń tonnaǵa deıin jetetin zamanaýı qoqys óńdeý keshenderi salynýda.
Jańa nysandar qoqysty kómýden Waste-to-Energy (qaıta óńdelmeıtin fraktsııalardan elektr energııasyn óndirý) tehnologııasyna kóshýge múmkindik beredi, bul óńirlerdegi polıgondardy bosatýǵa septik etpek. Qatty turmystyq qaldyqtardy kádege jaratý zaýyttaryn salý jónindegi osyndaı jobalar Qaraǵandy, Atyraý, Aqtóbe, Pavlodar jáne elimizdiń basqa da iri qalalarynda josparlanyp otyr.
Kádege jaratý alymy qarajaty esebinen qaldyqtardy basqarý salasyndaǵy jobalar qarjylandyrylyp jatyr. Búgingi tańda belgili bir nátıjelerge qol jetkizildi, máselen, maquldanǵan jalpy somasy 371,9 mlrd teńge bolatyn 68 jobanyń 122,6 mlrd teńgelik 34 jobasy qarjylandyryldy. Bul rette onyń 9,9 mlrd teńge bolatyn 15-i paıdalanýǵa berildi. Sonymen qatar, EcoQoldau baǵdarlamasy aıasynda qaǵaz, shyny, shınalar men plastıkti qosa alǵanda, qaldyqtardyń 162 myńnan astam túrin jınaýǵa 5,3 mlrd teńge baǵyttaldy.
Jalpy, 6 jyl ishinde Prezıdenttiń eldi mekenderdi kógaldandyrý jáne ormandy alqaptardy qalpyna keltirý jónindegi Joldaýynda qoıǵan mindetteri sheńberinde 18,1 mln aǵash otyrǵyzyldy. Ormandy qalpyna keltirý jumystary aıasynda osy kezeńde 1 mln gektardan astam alqapqa shamamen 1,7 mlrd aǵash otyrǵyzyldy. Qazaqstannyń ormandy alqaptarynyń kólemi 14 mln gektarǵa jetti.
Aıta keteıik, eldi mekenderdiń tsıfrlyq pasporty engizilýi múmkin.
