Prezıdenttiń tapsyrmasymen Májilis tóraǵasy Arab-Islam sammıtine qatysty
DOHA.KAZINFORM – Memleket basshysy Qasym-Jomart Toqaevtyń tapsyrmasymen Májilis spıkeri Erlan Qoshanov Qatar astanasy Dohada ótken tótenshe Arab-Islam sammıtine qatysty. Alqaly jıynda Palata tóraǵasy sóz sóılep, halyqaralyq qaqtyǵystardy retteý boıynsha memleketimizdiń ustanymdaryn ortaǵa saldy.
Sammıt barysynda Erlan Qoshanov Qatar Ámiri sheıh Támım ben Hamad Ál Tánımen jeke kezdesip, Qazaqstan Prezıdenti Qasym-Jomart Toqaevtyń shynaıy sálemi men izgi tilekterin jetkizdi.
Qatar Ámiri Izraıl bıligi jasaǵan áskerı áreketke qatysty Qazaqstannyń ustanymyn joǵary baǵalap, rızashylyǵyn bildirdi.
– Qazaqstannyń bul áreketti alǵashqy bolyp aıyptap, Qatarǵa qoldaý bildirgenin jaqsy bilemin. Sol úshin alǵysymyz zor. Qazaqstan Prezıdentimen erekshe baýyrlyq, dostyq qarym-qanytasymyz bar. Sony men maqtan tutamyn. Búgingi sammıte qazaq delegatsııasynyń osyndaı joǵary deńgeıde qatysqany biz úshin óte mańyzdy, – dedi Qatar Ámiri.
Sammıt otyrysynda sóz sóılegen Májilis tóraǵasy qazirgi tańda Taıaý Shyǵys aımaǵy úlken geosaıası qıyndyqtarǵa tap bolǵanyn aıtyp, búgingi sammıt halyqaralyq ahýaldyń kúrt nasharlaýymen baılanysty ekenine nazar aýdardy.
– Qazaqstan Izraıldiń Qatar Memleketi aýmaǵyndaǵy áskerı is-áreketin qatań aıyptaıdy. Bul ustanymdy Prezıdentimiz Qasym-Jomart Kemeluly Toqaev alǵashqy bolyp málimdep, Qatar memleketine tabandy qoldaýyn bildirdi. Jasalǵan shabýyl qandaı maqsatty kózdese de, mundaı áreketterge jol berilmeýge tıis. Bul Qatar Memleketiniń egemendik quqyǵyn buzady jáne halyqaralyq quqyq qaǵıdattaryna qaıshy keledi. Osyndaı shabýyl memlekettiń qaýipsizdigine ǵana emes, halyqaralyq tártiptiń negizin basshylyqqa alatyn memleketterdiń teńdigi men egemendigine de nuqsan keltiredi, – dedi Erlan Qoshanov.
Májilis spıkeri Qatardyń óz bitimgershilik saıasaty arqasynda jahandyq turaqtylyq pen qaýipsizdikti qamtamasyz etýge orasan úles qosyp keletinin atap ótip, halyqaralyq qaqtyǵystar men janjaldardy retteý máselesi boıynsha Qazaqstannyń ustanymdaryn ortaǵa saldy.
– Kez kelgen daǵdarys Birikken Ulttar Uıymynyń Jarǵysy men halyqaralyq quqyq normalary negizinde beıbit dıalog arqyly sheshilýi kerek. Qazaqstan Prezıdenti qaqtyǵystardy sheshýde osy qaǵıdalardy tolyqqandy qoldanýǵa, olardyń myzǵymastyǵyn qamtamasyz etýge shaqyryp keledi. Áskerı kúsh qoldaný tek zorlyq-zombylyqtyń jańa tolqynyn týǵyzady, beıkúná jandardyń qazasyna ákep soqtyrady, – dedi Erlan Qoshanov.
Osy oraıda Májilis tóraǵasy Gazada bolyp jatqan qaıǵyly oqıǵalarǵa da toqtalyp ótti.
Qazaqstan Prezıdenti áýel bastan Gaza sektoryndaǵy áskerı áreketterdi dereý toqtatýǵa jáne onyń turǵyndaryna gýmanıtarlyq kómek kórsetýge turaqty túrde shaqyryp keledi. Elimiz Gazaǵa qarjylaı jáne materıaldyq kómek kórsetip jatyr.
Bul úrdis bıyl qańtar aıynda shtab-páteri Astanada ornalasqan Azyq-túlik qaýipsizdigi jónindegi Islam uıymy arqyly da jalǵasty. Osy turǵyda Erlan Qoshanov Palestına halqyna gýmanıtarlyq kómekti arttyrý úshin ıslam elderin atalǵan uıymnyń áleýetin paıdalanýdyń mańyzdylyǵyn atap ótti.
Sonymen birge sammıt alańdarynda Májilis spıkeri Qatar Memleketiniń Premer-mınıstri – Syrtqy ister mınıstri sheıh Muhammed ben Abdýlrahman Ál Tánımen pikir alamasyp, eki el arasyndaǵy yntymaqtastyqty joǵary baǵalady.
Qatar Izraıl shabýylynan keıin shuǵyl sammıt ótkizetinin jazǵan edik.