Qazaqstan Táýelsizdik alǵannan bastap Reseımen dostyq qatynasty damytýǵa mán berdi — Prezıdent
ASTANA. KAZINFORM — Rossııskaıa gazeta basylymynda Memleket basshysy Qasym-Jomart Toqaevtyń «Máńgilik dostyq — halyqtarymyzǵa jol silter temirqazyq» degen taqyryppen avtorlyq maqalasy jaryq kórdi.
— Qazaqstan men Reseı — bul odaqtas memleketter ári strategııalyq seriktestikter. Tarıhtyń ózi bizdiń máńgilik dostyǵymyzdy, barlyq saladaǵy aýqymdy yntymaqtastyǵymyzdy, gýmanıtarlyq saladaǵy tyǵyz ózara is-qımylymyzdy aıqyndap berdi. Halyqtarymyz ǵasyrlar boıy ıyq tirese ómir súrip, qýanyshty da, qıyndyqty da birge bólisti. Eýrazııanyń ortaq mádenı keńistigin birlese qalyptastyrdy. Bizdi dástúrli qundylyqtardy ortaq qabyldaý, qazirgi zamannyń ózekti máselelerine uqsas kózqarastar, baýyrlas halyqtardyń ál-aýqatyn qamtamasyz etý jolyndaǵy birlesken jumys biriktiredi, — dep atap ótedi Prezıdent.
Memleket basshysy osynaý myzǵymas negizdiń arqasynda Qazaqstan men Reseı halyqtarymyzdyń tarıhyna, mádenıetine, dástúrlerine ózara qurmet tanyta otyryp, kópqyrly yntymaqtastyq jolymen nyq ilgerilep kele jatqanyna nazar aýdartady.
— Qazaqstan Táýelsizdik alǵan sátten bastap Reseımen dostyq qatynastardy damytýǵa aıryqsha mán berdi. Eldiń alǵashqy syrtqy saıasat tujyrymdamasynda, al sodan keıingi osyǵan uqsas qujattarda reseılik baǵyt ózgermeıtin basymdyq retinde bekitilgen. 1992 jyly Máńgi dostyq, yntymaqtastyq jáne ózara kómek týraly alǵashqy shartqa qol qoıylyp, ol memleketaralyq qatynastardyń berik irgetasyn qalady jáne halyqtarymyzdyń sanaly tańdaýynyń sımvolyna aınaldy. Sodan beri álemde de, postkeńestik keńistikte de kóp nárse ózgerdi. Biraq Shart mátininde tujyrymdalǵan negizgi tezıs ózektiligin joǵaltqan joq: máńgi dostyq — bul jaı ǵana sóz tirkesi emes, ol bizdiń halyqtardyń qazirgi jáne bolashaq zamannyń kúrdeli, san qyrly shyndyǵyn fılosofııalyq ári saıası turǵydan qabyldaýynyń dál kórinisi, — dedi Qasym-Jomart Toqaev.
Aıta ketelik Prezıdent Qasym-Jomart Toqaev 11-12 qarashada Reseı Federatsııasyna memlekettik saparmen barady.