Prezıdenttiń Máskeý saparynda jańa deklaratsııaǵa qol qoıylady

ASTANA. KAZINFORM — Prezıdent Qasym-Jomart Toqaev Reseıdiń «Rossııskaıa gazeta» basylymyna shyqqan «Máńgilik dostyq — halyqtarymyzǵa jol silter temirqazyq» atty avtorlyq maqalasynda Máskeýdegi saparynyń basty maqsatyna toqtaldy. 

— Qazaqstan men Reseı shynymen úlgili memleketaralyq qatynastar ornatty. Biz otyz jyldan astam ýaqyt boıy eki halyqtyń ıgiligi úshin kóp qyrly yntymaqtastyǵymyzdy turaqty túrde damytyp kelemiz. Prezıdent Vladımır Pýtınmen aldaǵy kelissózder olardy jańa mazmunmen tolyqtyrý turǵysynan erekshe mańyzǵa ıe.

Meniń Máskeýge saparymnyń kún tártibi keń. Sonyń ishinde Qazaqstan-Reseı qarym-qatynasynyń jan-jaqty strategııalyq áriptestik pen odaqtastyq deńgeıine kóshýi týraly deklaratsııaǵa qol qoıý basty másele bolmaq. Árıne, bul qujat ekijaqty baılanystyń jańa dáýirin ashyp, ózara senimdiliktiń buryn-sońdy bolmaǵan deńgeıin jáne barlyq baǵyt boıynsha tyǵyz jumys isteýge birlesken daıyndyqty bastaıdy, — deıdi Qasym-Jomart Toqaev.

Maqalada Reseı Federatsııasy Qazaqstannyń eń iri syrtqy saýda seriktesteriniń úshtigine kiretinin aıtylǵan.

— Óz kezeginde Qazaqstan Reseıdiń negizgi saýda seriktesteriniń bestigine kirip otyr. Bizdiń taýar aınalymymyz senimdi túrde ósip jatyr jáne kólemi 30 mlrd dollarǵa jaqyndap keledi.

Investıtsııalyq yntymaqtastyq belsendi damyp jatyr. Reseılik ınvestorlar elimizdiń ekonomıkasyna salǵan ınvestıtsııa kólemi boıynsha kóshbasshylardyń qatarynan tabylyp otyr. Bul Qazaqstannyń ınvestıtsııalyq tartymdylyǵy joǵary ekenin, eki memleket arasyndaǵy berik iskerlik baılanystar men senim ornaǵanyn ańǵartady, — deıdi Prezıdent. 

Aıta ketelik Prezıdent 11-12 qarashada Reseı Federatsııasyna memlekettik saparmen barady.