Prezıdenttiń qolynan marapat alý – úlken qurmet – batysqazaqstandyq qutqarýshy
ASTANA. KAZINFORM – Memleket basshysynyń Jarlyǵymen qyzmettik boryshyn atqarýdaǵy janqııarlyǵy, sondaı-aq elimizdegi sý tasqyny kezeńindegi kórsetken erligi úshin batysqazaqstandyq qutqarýshy, Oral qalasyndaǵy № 8 órt sóndirý bóliminiń bólimshe komandıri, azamattyq qorǵaý aǵa serjanty Qýanysh Qumarshıev Rahymjan Qoshqarbaev atyndaǵy III dárejeli «Aıbyn» ordenimen marapattaldy.
Búgin Prezıdenttiń qolynan joǵary marapat alǵan Qýanysh Asylbekuly Kazinform tilshisine saltanatty tapsyrý rásiminde erekshe tolqynys ústinde bolǵanyn jetkizdi.
«Joǵarǵy Bas qolbasshynyń qolynan marapat alý – keremet sezim. Aqordaǵa baryp, osyndaı qurmetke bólengenime qýanyshtymyn. Prezıdentimiz aıtqandaı, bıylǵy sý tasqyny kezinde halqymyz syn saǵatty basynan keshti. Sonyń qatarynda bizder, qutqarýshylar da boldyq. Qaratóbe aýdanynda bolǵan kezde joldy sý shaıyp ketkendikten, № 8 órt sóndirý bólimi bastyǵynyń orynbasary, azamattyq qorǵaý maıory Manarbek Sultanovpen birge jol kórsetý úshin avtokóliktiń aldynan júrip otyrýǵa týra keldi. Oral qalasynan Qaratóbege jedel járdem kóligimen naýqasty ákele jatyr eken. Oǵan qosa aýdan ortalyǵyna gýmanıtarlyq kómekti der kezinde jetkizý, barlyq avtokólikti sýdan qaýipsiz ótkizý qajet boldy. Mine, biz muzdaı sýdy keshe otyryp, tehnıkaǵa jol kórsetip, óz mindetimizdi atqaryp shyqtyq», - deıdi Q.Qumarshıev.
BQO TJ departamentiniń baspasóz qyzmetinen túsken málimetke qaraǵanda, Qýanysh Qumarshıev azamattyq qorǵaý organdarynda 2017 jylǵy jeltoqsannan beri, bıylǵy qańtardan bastap № 8 órt sóndirý bóliminiń bólimshe komandıri laýazymynda qyzmet etip keledi.
Eske sala keteıik, budan buryn BQO-da muzdaı sý keshken qutqarýshy týraly jazǵan bolatynbyz.
