Prezıdenttiń kezekti saılaýy ókilettik merzimi aıaqtalýyna kemi 2 aı qalǵanda ótedi – reforma
ASTANA. KAZINFORM — El Konstıtýtsııasynyń 41-babyna ózgeris engizilip, Prezıdenttiń kezekti saılaýy onyń ókilettik merziminiń aıaqtalýyna keminde 2 aı qalǵanda ótkiziledi dep belgilenedi. Bul týraly Konstıtýtsııalyq reformalar jónindegi komıssııanyń ekinshi otyrysynda Ádilet mınıstri Erlan Sársembaev aıtty.
- QR Konstıtýtsııasynyń 41-baby Prezıdenttiń kezekti saılaýyn taǵaıyndaý jáne ótkizý tártibin retteı otyryp, joǵary memlekettik bıliktiń jańaryp otyrýyna qatysty konstıtýtsııalyq sheńberdi belgileıdi. Qoldanystaǵy redaktsııadaǵy Konstıtýtsııada saılaýdy ótkizý kúni naqty bekitilgen, ıaǵnı, jeltoqsan aıynyń birinshi jeksenbisi dep kórsetilgen. Mundaı norma ártúrli, obektıvti mán-jaılardy eskerýge múmkindik bermeıdi ári ókilettik merziminiń aıaqtalýy men saılaý kúni arasyndaǵy merzimdik aıyrmashylyqtyń týyndaýyna ákep soǵýy múmkin. Osyǵan baılanysty Konstıtýtsııanyń 41-babynda Prezıdenttiń kezekti saılaýy onyń ókilettik merziminiń aıaqtalýyna keminde 2 aı qalǵanda ótkiziledi dep kózdeledi,- dedi Erlan Sársembaev.
Mınıstrdiń paıymynsha, bul redaktsııada Memleket basshysynyń saılaý kúni onyń ókilettik merzimi aıaqtalý kúnimen oraı belgilenip, quqyqtyq aıqyndyq qamtamasyz etiledi ári ıkemdilik artady.
- Sonymen qatar Prezıdent saılaýynyń prezıdenttik elektoraldyq tsıkilmen tuspa-tus kelmeýi jónindegi talap saqtalady. Sondaı-aq Konstıtýtsııanyń 41-babynan tıisti tarmaqty alyp tastaý usynylady. Atalǵan tarmaqqa sáıkes, kezekten tys Prezıdent saılaýy respýblıka Prezıdentiniń sheshimimen taǵaıyndalyp, konstıtýtsııalyq zańda belgilengen tártippen merzimde ótkiziletin,- dedi mınıstr.
Aıta keteıik, Ákimshilik sottarǵa konstıtýtsııalyq quqyqtyq mártebe berý usynyldy.