Prezıdenttiń qatysýymen Parlament palatalarynyń birlesken otyrysy bastaldy
ASTANA. KAZINFORM — Búgin elordada Memleket basshysy Qasym-Jomart Toqaevtyń qatysýymen Parlament palatalarynyń birlesken otyrysy bastaldy.
Aıta keteıik, jaqynda Májilis tóraǵasy Erlan Qoshanov Parlament jumysyn 30 maýsym kúni Qazaqstan Prezıdenti qorytyndylaıtynyn málim etti.
Eske salsaq, Parlament jańa Konstıtýtsııany iske asyrý úshin birqatar konstıtýtsııalyq zańdy qarady. «Prezıdent», «Astananyń mártebesi», «Ákimshilik-aýmaqtyq qurylys» týraly zańdar jańaryp, «Quryltaı jáne onyń depýtattarynyń mártebesi», «Halyq Keńesi» týraly múldem jańa zańdar qabyldandy. Osylaısha, Ata zańnyń kúshine enýi úshin barlyq jumys atqaryldy. Sonymen qatar depýtattar «Jańa Konstıtýtsııanyń kúshine enýine baılanysty raqymshylyq jasaý týraly» zań qabyldady. Elimizde qylmystyq raqymshylyqpen birge, alǵash ret ákimshilik raqymshylyq jasaldy.
26 maýsym kúni Májilis tóraǵasy Erlan Qoshanov VIII saılanǵan QR Parlamentiniń tórtinshi sessııasyndaǵy palatanyń jumysyn qorytyndylady.
Sonymen qatar 29 maýsymda Senat tóraǵasy Máýlen Áshimbaev palatanyń sońǵy jalpy otyrysyn ótkizdi.
30 jylda Senattyń 890-nan astam jalpy otyrysy ótkizilgen. Sol otyrystarda úsh jarym myńnan astam zań qabyldanǵan. Olardyń ishinde 350-den astamyna nemese árbir onynshy zańǵa Parlament depýtattary bastamashylyq jasaǵan.
Eske salsaq, bıyl 1 qyrkúıekten bastap jańa Parlament — Quryltaı óz jumysyna kirisedi.
Ata zańnyń 94-babyna sáıkes, Respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady. Respýblıkalyq referendýmda Konstıtýtsııa qabyldanǵan kún memlekettik mereke — Qazaqstan Respýblıkasynyń Konstıtýtsııasy kúni dep jarııalanady.
Naqtyraq aıtqanda, jańa Konstıtýtsııanyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan.
Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi. Birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde Qazaqstan Respýblıkasynyń Prezıdenti Quryltaıdyń kelisimimen Vıtse-Prezıdentti taǵaıyndaýǵa tıis.
