Prezıdenttiń Halyqaralyq áıelder kúnine arnalǵan saltanatty jıynda sóılegen sóziniń tolyq mátini

Memleket basshysy Qasym-Jomart Toqaevtyń Halyqaralyq áıelder kúnine arnalǵan saltanatty is-sharada sóılegen sózi

Qymbatty hanymdar!

Eń aldymen, kóktemniń shyraıly merekesi – Halyqaralyq áıelder kúnimen barshańyzdy shyn júrekten quttyqtaımyn! Bul meıram – meıirim men jylýlyqtyń, danalyq pen sulýlyqtyń nyshany. Áıel – tirshiliktiń tiregi, berekeniń bastaýy. Bul – aqıqat. «Besikti de, álemdi de terbetken» áıeldiń júregi – izgiliktiń mekeni. Sondyqtan áıeldiń qadiri – eldiń qadiri dep aıtsaq artyq bolmaıdy. Búgin men Aqorda tórinde Sizderge jáne barsha Qazaqstan áıelderine zor rızashylyǵymdy jáne alǵysymdy aıtamyn.

Halqymyz qaı zamanda da anasyn ardaqtaǵan, qaryndasyna qorǵan bolǵan, qyzdaryn syılap, tórinen oryn bergen. Jurtymyz eń kıeli qundylyqtarǵa «Ana» sózin qosyp, «Otan Ana», «Jer Ana», «Ana tili» dep kóne zamannan beri aıtyp keledi. Babalarymyz «Atadan – ósıet, anadan – qasıet» degen. Osy maǵynasy tereń dástúr qazirgi qubylmaly, kúrdeli zamanda mindetti túrde óz jalǵasyn tabýy kerek. Bul maqsatty oryndaý – urpaqtar aldyndaǵy paryzymyz. Óıtkeni ultymyzdyń bolmysy, tili men dili, salt-dástúri urpaqqa ananyń aıaly alaqanymen, taǵylymdy tárbıesimen darıdy.

Tól tarıhymyzda er azamattarmen birge erlik pen eldiktiń týyn bıik ustaǵan arýlar kóp bolǵan. «Qyzdyń qyryq jany bar» dep halqymyz beker aıtpaǵan. Rýhy myqty qaısar qyzdarymyz ult jylnamasynda óshpes iz qaldyrǵan. Tumar hanym, Aısha bıbi, Domalaq ana, Súıinbıke, Aıǵanym hansha men Zere ananyń esimderi el jadynda máńgi qalady. Búginde Sizder asa qurmetti analarymyz jáne apalarymyz salǵan dara joldy laıyqty jalǵastyryp kelesizder. Qyzdarymyz el ıgiligi jolynda tabysty eńbek etip, Qazaqstannyń damýyna orasan zor úles qosýda.

Qıyndyǵy men syn-qateri qatar júretin asa jaýapty qyzmetterde jumys isteıtin názik jandylar az emes. Olar Otan aldyndaǵy paryzyna adal bolyp, elimizde Zań men tártiptiń ornyǵýyna atsalysyp jatyr. Ádil sot tóreligin júzege asyryp júrgen sýdıalardyń jartysynan kóbi – áıelder. Sondaı-aq Tótenshe jaǵdaılar, Prokýratýra, Іshki ister, Qorǵanys jáne arnaýly qyzmet salasynda 45 myńnan astam áıel eńbek etýde.

Jaqynda Dýbaıda kúshtik qurylymdar men arnaıy jasaqtardyń SWAT Challenge jarysy ótti. Asa bedeldi halyqaralyq saıysta elimizdiń «Tomırıs» quramasy eshkimge des bermeı, qyzdar arasynda úzdik atandy. Olar baıraqty básekede shydamdylyq pen sheberliktiń ozyq úlgisin kórsetti. Bul Álııa Moldaǵulova jáne Mánshúk Mámetovanyń dańqty jolyn úzbeı kele jatqan naǵyz batyr qyzdarǵa tán qasıet ekeni sózsiz.

Sonymen qatar búgin men ǵylymda, ónerde, sportta, densaýlyq saqtaý salasynda, memlekettik qyzmette, bızneste jáne el ómiriniń basqa da mańyzdy salalarynda tabandy eńbek etip júrgen áıelderdiń kóp ekenin atap ótkim keledi.

Marfýǵa Ájiǵalıeva jarty ǵasyrdan asa ýaqyt medıtsına salasynda eńbek etip júr, 40 jyl boıy ýchaskelik terapevt boldy, dárigerler áýletiniń bastaýynda tur. Búgin ol elimizdiń joǵary nagradasy – «Otan» ordenimen marapattalady.

Jetisý oblysyndaǵy sharýa qojalyǵynyń jetekshisi Shakıra Ydyrysova aýyl sharýashylyǵy salasynda 50 jyldan beri jumys istep keledi. Joǵary óndiristik nátıjelerge qol jetkizip, aýdan men oblys kóleminde abyroıǵa ıe boldy. Men ony birinshi dárejeli «Eńbek dańqy» ordenimen marapattaý jóninde sheshim qabyldadym.

Shahmattan álemniń úsh dúrkin chempıony Bıbisara Asaýbaeva el mereıin ósirip, qazaqty naǵyz zııatker ult retinde jer júzine tanytyp júr. Áıgili shahmatshy ІІ dárejeli «Barys» ordenimen marapattalady. Ókinishke qaraı, ol Taıaý Shyǵysta bolyp jatqan jaǵdaıǵa baılanysty búgin shetelden Astanaǵa kele almady.

«Qazaqstannyń eńbek sińirgen qaıratkeri» qurmetti ataǵy Parlament Senaty tóraǵasynyń orynbasary, qarjy salasynyń tájirıbeli mamany Olga Perepechınaǵa, Májilis depýtattary Snejanna Imasheva men Ekaterına Smyshlıaevaǵa beriledi. Olar zań shyǵarý qyzmetindegi jemisti eńbekterimen osy qurmetke jetip otyr. Bul joǵary ataqqa kórnekti ǵalym, munaı-gaz salasyndaǵy ónertapqysh Mánsııa Babasheva da ıe boldy. Almaty qalasyndaǵy №95 mektep-lıtseıiniń hımııa páni muǵalimi Tatıana Beloýsovaǵa «Qazaqstannyń eńbek sińirgen ustazy» qurmetti ataǵy berildi. Onyń pedagog retindegi eńbegi jýyrda halyqaralyq deńgeıde keńinen moıyndaldy. Osy ataqqa azamattyq ustanymymen belgili, ásirese, bilim berý salasyndaǵy máselelerdi jıi kóterip júrgen Májilis depýtaty Irına Smırnova da laıyq.

Ótken aptada ǵana Krıstına Shýmekova konkımen júgirýden jastar arasyndaǵy bes dúrkin álem chempıony atanyp, Qazaqstannyń abyroıyn asqaqtatty. Búgin oǵan «Parasat» ordeni tabystalady.

«Parasat» ordenimen belgili jazýshy, aýdarmashy, tilimizdiń naǵyz janashyry Kamal Álpeıisova marapattalady.

Aramyzda otyrǵan Marııa Zeınelovanyń eren eńbegin de atap ótý qajet. Ardager maman Naýryzym qoryǵynda 43 jyl jumys istep, tabıǵatty qorǵaý isine zor úles qosty.

Al Aısulý Shýaqbaeva 40 jyldan astam munaı óndirý salasynda qajyrly eńbek etip, el ıgiligin arttyrýǵa atsalysyp keledi. Óz mindetin minsiz atqaryp júrgen mamandar «Qurmet» ordenimen marapattalady.

Osy zalda qazaq tili men ádebıetiniń muǵalimderi de bar. Olar bilimdi, oıy ushqyr, shyǵarmashyl jáne otanshyl urpaq tárbıeleýge mol úles qosyp júr. Osyǵan oraı, tájirıbeli pedagog Janna Levkovıchke «Qurmet» ordeni, al jas muǵalim Marııa Sýrınaǵa «Shapaǵat» medali tabystalady.

Tikushaq pıloty Aqerke Shopataevanyń eńbegi asa mańyzdy desek qate bolmaıdy. Ol talaı márte orman órtin sóndirýge jáne basqa da qutqarý jumystaryna qatysyp, kásibı turǵydan bilikti maman retinde qajyrly qyzmet etýde. Búgin oǵan «Eren eńbegi úshin» medali beriledi.

Budan bólek, Japonııadan kelgen belgili ónerpaz Sýzýkı Kanon da osy saltanatty is-sharaǵa arnaıy shaqyryldy. Sýzýkı hanym Qazaqstanda balet ónerin damytýǵa belsene atsalysýda. Sondyqtan ony «Eren eńbegi úshin» medalimen marapattaımyn.

Biz Otanymyzdyń kórkeıip, gúldenýine zor eńbek sińirip júrgen osyndaı arýlardy maqtan tutamyz, olardy jas býynǵa úlgi etemiz.

«Otan otbasynan bastalady» degen sózdiń tereń ári jan-jaqty maǵynasy bar. Qazaq áıelderi shańyraqtyń yrys-berekesin arttyryp, ónegeli urpaq ósirip otyr. Otbasyndaǵy qasıetti mıssııasy men Otan aldyndaǵy qasterli mindetin qatar atqaryp júr. Men muny elge degen súıispenshiliktiń kórinisi jáne úlken eńbektiń arqasy dep sanaımyn. Ár otbasynda turaqtylyq, bereke-birlik pen yrys-nesibe bolsa, Otanymyz da ósip-órkendeıdi.

Áıel – ulttyń jan-dúnıesi desek, artyq aıtqandyq emes. Olar – shabyttyń qaınar bulaǵy, shyǵarmashylyq mýzasy, ádemilik etalony. Álemdegi sulýlyqtyń bári áıel beınesimen astasady.

Elimizdiń damýynda áıelder qaýymynyń róli orasan zor. Kez kelgen jumysta, mektepte, ýnıversıtette, kásiporynda, medıtsınalyq mekemede, áskerı bólimde jáne basqa ortada bolsyn, ádette áıelder aıryqsha eńbeksúıgishtigimen, asqan jaýapkershiligimen úlgi kórsetedi. Qyz-kelinshekterdiń yntasy joǵary, muqııat, jınaqy, sondyqtan olarǵa kóbirek senim artady. Ádette «názik jandy» dep ataımyz, biraq shyn máninde olar qıyn sátterde erik-jigeri muqalmaı, tabandy minezi men tózimdiligi, sheshimtaldyǵy arqasynda erlikke parapar is atqarady.

Adamzattyń kórkem jaratylysy sanalatyn aıymdarymyz náziktigine qaramastan kóp mindetti, tipti áıelderge tán emes aýyrtpalyqty moıymaı kóterip júr. Biraq moıyndaýymyz kerek, qanshama qıyndyqqa, kedergige, jaýapkershilikke, keıde er-azamattardyń olqylyǵynan bolatyn keleńsizdikterge tap bolsa da, áıel árqashan aqyl men ajardyń aınasy bolyp qala beredi. Áıelderdiń basty qupııasy da, áý bastaǵy tabıǵı bolmysy da osynda.

Olar qalasa, kúndelikti kúıbeń tirlikti merekege aınaldyra alady, jadaý kóńilińe jarqyn sáýle túsiredi, múmkin emesti múmkin qylady, tipti, soǵysty da toqtatyp, beıbit ómir ornatady. Ulttyń bolashaǵy áıelderge baılanysty desek qatelespeımiz.

Qazaq qyzynyń joly, taǵdyry eshqashan kedir-budyrsyz, ıaǵnı qıyndyqsyz bolmaǵan. Oǵan tarıh kýá. «Qyzdyń joly jińishke», «Qyzǵa qyryq úıden tyıym» degen túsinikter halyq sanasyna ábden sińip ketken. Sebebi, biz – qyz balanyń abyroıyn el bolashaǵynyń kepili dep sanaıtyn elmiz. Áıeldiń tabıǵaty erekshe, jany názik bolsa da, bolmysy myqty dep aıtýǵa tolyq negiz bar.

Áıelderdiń adaldyǵy, uqyptylyǵy, eńbekqorlyǵy, al, kerek bolsa, batyrlyǵy men qaısarlyǵy bárimizge belgili. Áıeldiń osyndaı erekshe bolmysynyń arqasynda qoǵamda adamı qundylyqtar qalyptasyp, elimizde senim men kelisim, ózara tileýlestik rýhy ornaıdy.

Qazir Qazaqstan aýqymdy jańǵyrý jolyna túsip jatqan kezeńde áıelderdiń jasampazdyq róli arta túsetini anyq.

Respýblıkalyq referendýmǵa shyǵarylǵan halyq Konstıtýtsııasynyń jobasy memleketimizdiń bolashaǵyn, damý baǵdaryn aıqyndaıtyn tarıhı qujat dep aıtýǵa tolyq negiz bar.

Álemdegi ahýal ýshyǵyp turǵan ýaqytta jańa Konstıtýtsııa Táýelsizdigimizdiń tuǵyryn nyǵaıtady, elimizdegi barlyq qoǵamdyq-saıası ınstıtýttardyń qyzmetine jańa serpin beredi.

Jańa Konstıtýtsııa jobasynyń negizgi arqaýy – Qazaqstannyń Táýelsizdigin, Egemendigi men terrıtorııalyq tutastyǵyn, azamattarymyzdyń quqyqtary men erkindigin qorǵaý.

Ata Zańnyń jańa jobasynda kóptegen damyǵan elderde kezdese bermeıtin naqty áleýmettik normalar keńinen qamtylǵan. Men buǵan senimdimin. Konstıtýtsııadaǵy atalǵan erejeler memleketimizdiń áleýmettik sıpatyn kúsheıte túsedi.

Qazaqstanda halyqty áleýmettik qoldaý júıesi óte jaqsy damyǵan. Memleket osy saladaǵy óz mindettemelerin múltiksiz ári ýaqtyly oryndap keledi. Júzden astam neshe túrli áleýmettik tólemder men jeńildikter bar, tegin qamtamasyz etiletin baǵdarlamalar kóp. Bul – búgingi kúnniń jaǵdaıy. Al biz erteńgi kúnge, alys bolashaqqa qaraýymyz kerek.

Eń bastysy – adam kapıtalyn jaqsartyp, ulttyń jańa sapasyn qalyptastyrý. Sondyqtan biz bilimdi, eńbekqor, jasampaz urpaqty, ıaǵnı adal azamattardy tárbıeleýge basa mán berýimiz qajet.

Qazirgi tańda dúnıe júziniń árbir túkpirinde adam kapıtaly nemese adam sapasy týraly aıtylýda. Bul – búgingi tehnologııalyq zamannyń suranysy, talaby. Elimiz úshin bul – asa mańyzdy strategııalyq mindet. Osy iste áıelderdiń róli aıryqsha ekeni sózsiz.

Qazaqstan áleýmettik saıasatqa árdaıym jaýapkershilikpen qaraǵan. Shyn máninde muqtaj azamattarymyzǵa naqty, ataýly kómek kórsetiledi. Bul saıasat aldaǵy ýaqytta da jalǵasady.

Mysaly, elimizde bala dúnıe kelgen kezde tıisti áleýmettik tólemder jasalady. Beriletin qarjynyń kólemi qomaqty. Budan bólek, sábı bir jarym jasqa tolǵansha jórgekpul tólenedi. Kóptegen memlekette, sonyń ishinde Eýropanyń baı-qýatty elderinde áıelder eki-úsh aıdan keıin jumysqa shyǵýǵa májbúr. Al Qazaqstanda jas analar úsh jylǵa deıin úıde otyryp, bala tárbıesimen alańsyz aınalysa alady. Sondaı-aq olardyń jumys orny saqtalady, dekrettik demalystaǵy ýaqyty eńbek ótiline qosa esepteledi.

Memleket basshysy retinde men ana men balany qoldaýǵa aıryqsha mán beremin. Muny Prezıdenttiń basqa da qyzmettik mindettemeleri sııaqty asa mańyzdy is dep sanaımyn. Bul baǵytta qajetti zańnamalyq jáne ınstıtýtsıonaldyq sharalar qabyldandy. Endi, mine, otbasy ınstıtýtyn qoǵamnyń turaqty damýynyń óte mańyzdy faktory retinde Konstıtýtsııa deńgeıinde kúsheıtemiz.

«Neke – er men áıeldiń memlekettik zańǵa sáıkes tirkegen erikti jáne teń quqyqty odaǵy» degen norma alǵash ret bekitilip otyr. Mundaı zań erejesi balalardyń quqyqtaryn qorǵaýǵa, sondaı-aq áıelder men analardyń otbasyndaǵy rólin nyǵaıtýǵa múmkindik beredi. «Neke jáne otbasy, ana, áke men bala memleket qorǵaýynda bolady» degen norma zamanǵa saı jańa mazmunmen tolyqty. Quqyqtyq turǵydan anaǵurlym dál tirkester arqyly qyzdardy turmys qurýǵa májbúrleý sekildi uıat qubylystarǵa Konstıtýtsııada tosqaýyl qoıylady.

Otbasyn qorǵaý máseleleri jónindegi ýákil qoǵamdyq laýazymyn engizý adam quqyqtarynyń qorǵalýy men otbasy ınstıtýtyn kúsheıtetinine senimdimin.

Otbasy ombýdsmeni Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń birinshi orynbasary retinde qyzmet etip, atqarylǵan ister týraly Memleket basshysyna esep berip otyrady.

Mundaı júıe turmystyq zorlyq-zombylyqtyń aldyn alý sharalaryn keshendi túrde jolǵa qoıýmen qatar, otbasy saıasatyndaǵy basqa mańyzdy túıtkilderdi sheshýge múmkindik beredi.

Halyq Konstıtýtsııasynyń jobasy referendýmda jurtshylyqtyń jappaı qoldaýyna ıe bolǵan jaǵdaıda memlekettigimizdiń ozyq ınnovatsııalyq júıesin qurýǵa zor múmkindik beretin bolady. Sondaı-aq bas qujat jasandy ıntellekt jáne jappaı tsıfrlandyrý dáýirinde Qazaqstannyń turaqty damýyna uzaq merzimdi jáne myzǵymas negiz qalaıtyny sózsiz. Deı turǵanmen sapaly adam kapıtaly bolmasa, qarqyndy tehnologııalyq damýǵa qol jetkizýdiń qıyn bolary aıdan anyq. Sondyqtan osy mańyzdy mindetti oryndaý úshin el ómiriniń barlyq salasyna, atap aıtqanda, áleýmettik saıasat pen ımmıgratsııany retteý máselesine jańasha kózqaraspen qarap, tyń tásilder ázirleý qajet bolady.

Taǵy da qaıtalap aıtamyn, tehnologııa damýynda naqty progreske qol jetkizý úshin sapaly adam kapıtalyn qalyptastyrý jáne damytý isin shyndap qolǵa alý kerek. Bul problemaǵa kóz juma qaraýǵa bolmaıdy. Demek áleýmettik saıasatty, sonyń ishinde ımmıgratsııa máselesin qaıta qarap, jańa tásilder ázirlegen jón.

Álem túbegeıli ózgerdi. Bul úderis barǵan saıyn údeı túsedi. Bizge de, ıaǵnı kúlli Qazaqstanǵa ózgeretin kez keldi. Áıtpese óte qıyn bolady.

Strategııalyq áleýetimizdiń kilti ınfraqurylym, tehnologııa, bilim jáne ǵylym salalarynda jatyr. Laıym solaı bolýǵa tıis. Ultty progress jolymen órge súıreıtin, elimizdi ótkenniń taptaýryn, qasań túsinikterinen ada órkenıetti ári úılesimdi qoǵamǵa aınaldyrýdyń alǵashqy qadamdary osy salalardan bastaý alýy kerek.

Alaıda jarqyn bolashaqqa qaraı umtylý túp-tamyryńdy umytý degen sóz emes. Másele – jahandyq úderisterge elikteý týraly da emes, aldymyzda turǵan maqsat – bolmysymyzdy joǵaltyp, babalarymyz amanat etken Uly dalanyń baǵa jetpes murasyn jadymyzdan shyǵaryp almaý. Oǵan bizdiń quqymyz joq. Degenmen «Dástúrdiń ozyǵy bar, tozyǵy bar» deıdi. Biz kóne zamannan beri kele jatsa da, qazirgi dáýirge saı keletin qundylyqtardy ǵana paıdalanýymyz kerek. Sonda ǵana dúnıe júzinde naǵyz jasampaz ult retinde moıyndalamyz.

Konstıtýtsııamyzdyń jańa jobasy mádenı kodymyzdy saqtap, jalpyulttyq biregeıligimizdi nyǵaıtýǵa múmkindik beredi. Osylaısha, elimizdiń Bas qujaty halqymyzdy dástúr men damý úılesim tapqan dańǵyl jolǵa túsirmek.

Qýatty jáne turaqty ekonomıkasy bar Ádiletti, básekege qabiletti Qazaqstandy qurýǵa jeteleıtin ornyqty damýdyń ınstıtýttyq jáne quqyqtyq negizderi Konstıtýtsııa jobasynda kórinis tapty.

Al qazirgi Ata Zańymyz qabyldanǵan shaqta Qazaqstan eńsesin endi tiktep jatqan edi. Ol kezde Egemendikti saqtap qalý, bılik ınstıtýttaryn qurý, eldegi turaqtylyqty qamtamasyz etý mindetterine basymdyq berildi. Búgingi Konstıtýtsııa elimizdiń qol jetkizgen barlyq jetistiginiń bastaýynda turdy. Bul – Qazaqstan Respýblıkasynyń Tuńǵysh Prezıdenti Nursultan Nazarbaevtyń arqasy. Biraq zaman bir jerde turmaıtyny belgili.

Qazir Qazaqstan – halyqaralyq bedeli bıik, saıası júıesi myǵym, ekonomıkasy ornyqty damyp jatqan qýatty memleket. Sheteldegi saıasatkerler men sarapshylar elimizdi iri orta memleket retinde moıyndap, qurmet bildirýde.

Biz BUU Jarǵysynyń negizine aınalǵan halyqaralyq quqyq saqtalýy qajet dep sanaımyz. Aldaǵy ýaqytta da osy qaǵıdattan aınymaımyz. Bul – Qazaqstannyń naqty ustanymy. Elimizdiń Konstıtýtsııasynda ulttyq zańnama talaptaryn eskermeı, ony ekinshi orynǵa qoıatyn ekiushty ereje bolmaýy kerek. Buǵan jol berýge bolmaıdy. Bul da Táýelsizdik pen Egemendik máselesi.

Ata Zańymyzda Qazaqstan halqynyń birligin, etnosaralyq, konfessııaaralyq kelisimdi, toleranttylyqty nyǵaıtatyn normalar bar. Bul – bizdiń saıası, rýhanı qundylyqtarymyz. Sondyqtan ony quqyqtyq tetikter arqyly kúlli qoǵam bolyp qorǵaýǵa mindettimiz.

Qazaqstannyń ekonomıkasy Ortalyq Azııa men Kavkaz óńirindegi eń úlken ekonomıka sanalady. Qazaqstan dúnıe júzindegi eń iri 50 ekonomıkanyń qataryna qosyldy. Bul 20 mıllıon halqy bar el úshin jaqsy nátıje dep aıtýǵa bolady.

Biz barlyq eldermen tyǵyz qarym-qatynasty damytyp, teńgerimdi, salıqaly, ult múddesine saı syrtqy saıasatty júrgize otyryp, óz jolymyzben júrip kelemiz.

Al jańa Konstıtýtsııany qabyldaý, bul – ýaqyt talaby, memleketimizdiń aldynda turǵan ózekti, shuǵyl mindet. Bas qujattyń jobasy Qazaqstannyń tuǵyry berik, baǵdary aıqyn, alysqa kóz tigetin ozyq oıly el ekenin kórsetedi. Onyń ár normasy ult múddesine qyzmet etedi. Ata Zań jobasynda Ádildik pen Otanshyldyq, Zań men Tártip, Tazalyq pen Adaldyq qaǵıdattary aıqyn kórinis tapty.

Biz bárimiz bir ult bolyp tarıhı joldyń torabyna jettik, endi halqymyz kele jatqan jalpyhalyqtyq referendýmda el taǵdyryna áser etetin tańdaýyn jasaıdy.

Men jańa Konstıtýtsııanyń mán-mańyzyna jaqyn arada taǵy da keńirek toqtalamyn.

Qadirli hanymdar!

Osy jerde Qazaqstannyń ár aımaǵynan kelgen kóptegen mamandyq ıeleri otyr. Sizder túrli salada tabysty jumys istep, elimizdiń áleýetin arttyrýǵa atsalysyp kelesizder. Ádiletti Qazaqstandy ózderińiz sııaqty jaýapkershiligi mol, jasampaz, kózi ashyq, tııanaqty, eńbekke adal azamattar quryp jatyr. Men muny úlken rızashylyqpen atap ótkim keledi. Bárińizdi zor qurmetke laıyq dep sanaımyn.

Sondyqtan búgin men Sizderdi joǵary memlekettik nagradalarmen marapattaý týraly Jarlyqqa qol qoıdym.

Barshańyzǵa qutty bolsyn!

Sizderge amandyq jáne tabys tileımin!