Prezıdenttiń bir aptadaǵy jumysyna sholý
Aqorda Prezıdent Qasym-Jomart Toqaevtyń 16-22 qazan aralyǵyndaǵy jumys aptasyna vıdeosholý jarııalady, dep habarlaıdy Kazinform.
Atap aıtqanda, 16 qazanda Memleket basshysy aqyn Nesipbek Aıtulynyń qazasyna baılanysty otbasy men jaqyn týystaryna kóńil aıtý jedelhatyn joldady.
Osy kúni Prezıdent Qytaı Halyq Respýblıkasyna resmı saparmen bardy.
17 qarashada Q.Toqaev QHR Tóraǵasy Sı Tszınpınmen kelissóz júrgizdi. QHR Tóraǵasy óz shaqyrýyn qabyl alǵany úshin Memleket basshysyna alǵys aıtyp, ózara tıimdi yntymaqtastyqty nyǵaıtý mańyzdy ekenin atap ótti. Osy kelissóz nátıjesinde eki eldiń delegatsııa músheleri birqatar qujatqa qol qoıdy.
QR Prezıdenti Beıjińde Ábý Nasyr Ál-Farabıge ornatylǵan bıýstti saltanatty túrde ashty.
Keıin Q.Toqaev Beıjiń lıngvıstıkalyq ınstıtýtynda taǵylymdamadan ótken kezinde ózine dáris bergen professor Lıý Shıtsınmen áńgimelesti. "40 jyldan keıin bilim alǵan ýnıversıtetime kelip, ózińizdi aman-saý kórgenime óte qýanyshtymyn. Men sizdiń eńbekqorlyǵyńyzdy, tabandylyǵyńyz ben erik-jigerińizdi erekshe baǵalaımyn. Sizdiń shákirtterge bergen bilimińizge baǵa jetpeıdi", - dedi Prezıdent. Odan ári Beıjiń Til jáne mádenıet ýnıversıtetine Ábý Nasyr Ál-Farabıdiń portretin syılap, osy oqý ornynda bilim alyp jatqan qazaqstandyq stýdenttermen júzdesti.
Sonymen qatar Memleket basshysy SINOPEC kompanııasy dırektorlar keńesiniń tóraǵasy Ma ıÝnshendi, YTO Express Co., Ltd kompanııasynyń basqarma tóraǵasy Iý Hýeı Dzıaony, CITIC Group kompanııasynyń basqarma tóraǵasy Chjý Hesındi qabyldady.
Al CRRC Sorporation Limited kompanııasynyń basqarma tóraǵasy ári atqarýshy dırektory Cýn ıÝntsaımen áńgime barysynda «Qazaqstan temir joly» kompanııasynyń Qytaıdyń SRRC kompanııasymen quny 1,3 mlrd dollar bolatyn kelisimge qol qoıatyny belgili boldy.
QHR Memlekettik keńesiniń Premeri Lı Tsıanmen kezdesýde Memleket basshysy qazaq-qytaı qatynasy qarqyndy damyp jatqany týraly atap ótti.
Búkilqytaılyq halyq ókilderi jınalysy Turaqty komıtetiniń tóraǵasy Chjao Letszımen áńgime barysynda ǵasyrlar boıǵy dostyq pen ózara qoldaýdyń berik arqaýyna súıene otyryp, Qazaqstan men Qytaı máńgilik ári jan-jaqty strategııalyq seriktestik rýhynda turaqty nyǵaıyp kele jatqan úlgili memleketaralyq yntymaqtastyqtyń negizin qalaǵany aıtyldy.
Qazaqstan Prezıdenti joǵary deńgeıdegi «Bir beldeý, bir jol» bastamasynyń ІІІ forýmyna qatysatyn delegatsııa basshylarynyń qurmetine oraı QHR Tóraǵasy Sı Tszınpınniń atynan uıymdastyrylǵan resmı qabyldaýǵa qatysty.
Sondaı-aq málim etilgendeı, Memleket basshysy joǵary deńgeıdegi «Bir beldeý, bir jol» forýmynyń aıasynda beıresmı jaǵdaıda Indonezııa Prezıdenti Djoko Vıdodomen, Pákistan Premer-mınıstriniń mindetin atqarýshy Anvar-ýl-Hak Kakarmen, Mońǵolııa Prezıdenti Ýhnaagıın Hýrelsýhpen, Ózbekstan Prezıdenti Shavkat Mırzıeevpen, Majarstan Premer-mınıstri Vıktor Orbanmen, Túrikmenstan Halk Maslahatynyń Tóraǵasy Gýrbangýly Berdimuhamedovpen jáne BUU Bas hatshysy Antonıý Gýterrıshpen júzdesti.
Q.Toqaevtyń QHR-ǵa sapary sheńberinde jalpy quny 16,54 mıllıard dollar bolatyn 30 kommertsııalyq qujatqa, sonyń ishinde ınvestıtsııalyq, saýda kelisimderine, óndiris tehnologııasyn berý, kredıt jelisin ashý jáne taǵy da basqa baǵyttardy qamtıtyn kelisimsharttarǵa qol qoıyldy.
18 qazanda Memleket basshysy Qytaıda «Bir beldeý, bir jol» halyqaralyq yntymaqtastyǵy III forýmynyń ashylý rásimine qatysty. Forýmda Qytaı Tóraǵasy Sı Tszınpın, Reseı Prezıdenti Vladımır Pýtın, Indonezııa Prezıdenti Djoko Vıdodo, Argentına Prezıdenti Alberto Fernandes, Efıopııa Premer-mınıstri Abıı Ahmed, BUU Bas hatshysy Antonıý Gýterrısh sóz sóıledi. Jalpy sharaǵa 20-dan astam memlekettiń basshylary jáne 130-dan asa el men halyqaralyq uıymdardyń ókilderi qatysty.
Osy kúni Q.Toqaev Qytaıǵa resmı sapary aıasynda Shyńjań-Uıǵyr avtonomııalyq aýdanynyń ortalyǵy Úrimji qalasyna bardy.
Onda QKP OK Saıası bıýrosynyń múshesi, Shyńjań-Uıǵyr avtonomııalyq aýdany partııa komıtetiniń hatshysy Ma Sınjýımen kezdesti.
19 qazanda QR Prezıdenti Astanada bastalǵan VI Azamattyq forým qatysýshylaryna úndeý joldap, Qazaqstanda júrgizilip jatqan aýqymdy ózgerister qoǵamda jańa etıka qalyptastyrýdy talap etetinin atap ótti.
20 qazanda elordada Qasym-Jomart Toqaev elimizdiń geologııa salasyna eńbek sińirgen bir top qaıratkermen – QR UǴA akademıgi Serikbek Dáýkeevpen, «Merıdıan Petroleým» JShS dırektory Baltabek Qýandyqovpen, Q.I. Sátbaev atyndaǵy Geologııalyq ǵylymdar ınstıtýtynyń dırektory Geroı Joltaevpen jáne «Mıneraldyq resýrstar akademııasy» qoǵamdyq birlestiginiń prezıdenti Bolat Újkenovpen kezdesti.
21 qazanda Memleket basshysy Ǵalymjan Qoıgeldıevti Qazaqstan Bas prokýrorynyń orynbasary laýazymyna taǵaıyndady.
Sondaı-aq Nurdáýlet Súıindikov Bas prokýratýranyń Aktıvterdi qaıtarý jónindegi komıtetiniń tóraǵasy boldy.
Jalpy osy apta ishinde bolǵan kadrlyq taǵaıyndaýlardy myna jerde oqýǵa bolady.
