Prezıdenttiń Aýǵanstan jónindegi arnaıy ókili Kabýlǵa jumys saparymen bardy
ASTANA. KAZINFORM – 5-14 jeltoqsan aralyǵynda Prezıdenttiń Aýǵanstan jónindegi Arnaıy ókili Erkin Tuqymov Kabýlda jumys saparymen bolady. Bul týraly QR Syrtqy ister mınıstrliginiń resmı ókili Aıbek Smadııarov habarlady.
Onyń aıtýynsha, sapar Astana men Kabýl arasyndaǵy saýda-ekonomıkalyq jáne mádenı-gýmanıtarlyq yntymaqtastyqty nyǵaıtýǵa, birlesken jobalardy damytý múmkindikterin talqylaýǵa jáne aldaǵy joǵary deńgeıdegi saparlarǵa daıyndyqqa baǵyttalǵan.
– Baǵdarlama aıasynda Aýǵan úkimetiniń ókilderimen ekijaqty ózara is-qımyl, óńirlik turaqtylyq jáne kólik-logıstıkalyq baılanystardy damytý máseleleri boıynsha kelissózder ótkizý josparlanǵan. Sondaı-aq Balh jáne Qandaǵar provıntsııalarynyń basshylyǵymen óńirlik yntymaqtastyqtyń praktıkalyq aspektileri qarastyrylady, – dedi Aıbek Smadııarov mınıstrlikte ótken aptalyq brıfıngide.
Buǵan deıin mınıstrlik ókili Taıland pen Kambodja shekarasyndaǵy qarýly qaqtyǵystar kýrorttyq aımaqtardan alys jerde bolyp jatqanyn aıtqan edi.
Sondaı-aq, Eýropaǵa vıza rejımin jeńildetý boıynsha kelissózdiń ekinshi raýndy Astanada ótedi.