Prezıdenttiń álem kóshbasshylarymen aýdarmashysyz tildesýiniń astarynda ne jatyr — sarapshy paıymy

ASTANA. KAZINFORM — Memleket basshysy Qasym-Jomart Toqaevtyń álem elderi kóshbasshylarymen sol memleket tilinde sóılesýiniń syry nede, onyń saıası astary bar ma? Bul taqyryp boıynsha QR Prezıdenti janyndaǵy strategııalyq zertteýler ınstıtýtynyń sarapshysy, saıası ǵylymdarynyń kandıdaty Aınur Týkýmova oıyn ortaǵa saldy.

— Tarıhta ár tulǵanyń róli bar, bul tusta bizdiń Prezıdent Qytaıǵa barsa, Qytaı prezıdentimen qytaı tilinde, Reseıge barsa orys tilinde, AQSh-qa barǵanda aǵylshyn tilinde sóıledi. Ol kisi álemdik deńgeıdegi dıplomat, BUU-nyń Bas Hatshysynyń orynbasary boldy, bul tusta osy faktor sheshýshi ról oınaǵan sııaqty. Bul kommýnıkatsııa, ıaǵnı áriptesimen tikeleı aýdarmashysyz til tabysýyn biz aqparat quraldarynan kórip otyrmyz. Tramp ózi Aq úıde ekskýrsııa jasady, beıresmı pikir almasý boldy, — dedi Aınur Týkýmova Kazinform agenttiginiń YouTube arnasynda shyǵatyn «BIZDIÑ ORTA» podkastynda.

Sarapshynyń málimdeýinshe, Qazaqstannyń utqyr bolǵan jeri, álemniń alpaýyt elderiniń basshylarymen tikeleı, teń deńgeıde sóılese alýy. 

— Qazaqstan dıplomatııasynyń basty jetistikteriniń biri Syrtqy ister mınıstrligi tarapynan biraz jumys istelindi. Qanshama jumys jasaldy, ol kózge kórinbeıdi. Sondyqtan da sózsiz qazir Qazaqstan dıplomatııasy óziniń shyrqaý sheginde. Barlyq tarappen bizde eshqandaı másele joq, kerisinshe biz alań usynyp otyrmyz. Ibrahım kelisimderine qosyldyq dep otyrmyz, ol da Qazaqstan dıplomatııasynyń bir jeńisi. Óıtkeni, biz Taıaý Shyǵys, Sırııa máselesine kóp kómektestik, bul Qazaqstanǵa degen úlken senim jáne sarapshylardyń aıtýy boıynsha bul formattyń bolashaǵy zor, óıtkeni bul formatqa Ońtústik Kavkaz elderi, Ázerbaıjan da qosylýy múmkin, — dep túsindirdi saıası sarapshy.

Budan buryn saıasattanýshy, halyqaralyq qatynastar boıynsha sarapshy Rızzat Tasym Qazaqstan 30 jyl ishinde orta derjava deńgeıine kóterilgenin aıtty.