Prezıdenttiń 2 mlrd aǵash egý tapsyrmasy nege keıinge qaldyryldy

ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev Prezıdenttiń 2 mlrd aǵash egý týraly tapsyrmasy nege 2025 jyldan 2027 jylǵa shegerilgenin túsindirdi.

− Biz 2023 jyly kúzden bastap, 2 mlrd aǵash egý jobasy boıynsha jan-jaqty zertteý júrgizdik. Eń birinshi tálimbaqtarda kóshettiń bar-joǵy, qansha tuqym jınalǵany tekserildi. Sebebi biz tuqymdy da, kóshetti de egemiz. Sonyń bárin zertteı kele, 2025 jyly 2 mlrd aǵash egý josparyn tolyq oryndaı almaımyz degen uıǵarymǵa keldik. Sol sebepti Prezıdentke hat jazyp, jobany 2027 jylǵa deıin uzarttyq, − dep jaýap berdi E.Nysanbaev Senatta tilshi suraǵyna.

Mınıstrdiń aıtýynsha, ótken jyly 500 tonnadaı tuqym jınaldy, aǵashtardyń eń kóp kólemi 2027 jylǵa qalyp otyr. Sebebi qylqan japyraqty aǵash kóshetin 2027 jyly otyrǵyzý úshin bıyl kóktemde tuqymyn ósirýdi bastaý kerek.

Sol sebepti qazir tálimbaqtarda aǵash ósirý máselesi jiti qadaǵalaýda. Búgingi kúni el boıynsha 1 mlrd 115 mln aǵash otyrǵyzylǵan.

− Ekinshiden mekemelerge jetispeıtin tehnıkany osy jyldary alyp, kelesi 2027 jyldary alǵa qoıǵan josparlardy tolyq iske asyramyz. Egilgen aǵashtarǵa da qatań baqylaý jasalyp otyr. Buǵan deıin aǵash ekken, biraq normatıvtik sanǵa jetpegen óńirler de esepke alynady. Mysaly, qaraǵaılar bir óńirde 1 gektarǵa 7 myńnan astam egilse, bir óńirde eki ese az, sebebi topyraǵy qunarsyz. Osyndaı óńirlerdi anyqtap, normatıvke jetkizý de qarastyrylyp jatyr, − dep túsindirdi E.Nysanbaev.

Eske sala ketsek, Prezıdent Q.Toqaev 2020 jylǵy Qazaqstan halqyna Joldaýynda 5 jylda 2 mlrd túp aǵash otyrǵyzý týraly tapsyrma bergen bolatyn.