Prezıdenttik jastar kadrlyq rezerviniń kelesi kezeńine ótken úmitkerler belgili boldy

ASTANA. KAZINFORM – Prezıdenttik jastar kadr rezerviniń resmı saıtynda testileýdiń kelesi blogy – «Sandyq aqparatpen jumys isteý qabiletin baǵalaýǵa» jiberilgen úmitkerler tizimi jarııalandy. 

Memlekettik qyzmet isteri agenttiginiń málimetinshe, 2-3 tamyzda ótken «Mátindik aqparatpen jumys isteý qabiletin baǵalaý» testileýine 4 876 úmitker qatysty. Kelesi kezeńge ótken jastardyń tolyq tizimimen pkrezerv.gov.kz resmı saıtynan tanysýǵa bolady.

Іrikteý tártibine sáıkes, kelesi testileý – «Sandyq aqparatpen jumys isteý qabiletin baǵalaýǵa» qatysýshylardyń jalpy sanynyń 50 paıyzy jiberiledi. Birneshe úmitkerdiń nátıjesi birdeı bolǵan jaǵdaıda kelesi testileý blogyna kóbirek qatysýshylar sany jiberilýi múmkin. Osylaısha, testileýdiń ekinshi blogy «Sandyq aqparatpen jumys isteý qabiletin baǵalaýǵa» eń jaqsy nátıje kórsetken 2 677 úmitker jiberildi.

Salalyq baǵyttar boıynsha ótý baly:

- «Agroónerkásiptik keshen jáne qorshaǵan ortany qorǵaý» – 14 ball;

- «Syrtqy saıasat jáne ınvestıtsııalar» – 17 ball;

- «Infraqurylymdy, ónerkásipti damytý jáne saýda saıasaty» – 16 ball;

- «Áleýmettik saıasat jáne azamattyq qoǵam» – 14 ball;

- «Tsıfrlandyrý» – 15 ball;

- «Ekonomıkalyq jáne qarjylyq saıasat» – 15 ball.

Testileýdiń ekinshi blogy osy jyldyń 9 tamyzynda ótedi. Bul kezeńde úmitker kesteler, grafıkalar jáne dıagrammalar túrindegi sandyq aqparatpen jumys isteý qabiletin anyqtaýǵa baǵyttalǵan 25 test tapsyrmasynan turatyn test tapsyrady.

«Sandyq aqparatpen jumys isteý qabiletin baǵalaý» testileýine jiberilgen úmitkerler 8 tamyz saǵat 23:59-ǵa deıingi merzimde (Astana ýaqyty boıynsha) óziniń jeke kabınetinde test tapsyrý ýaqytyn tańdaýy qajet.

– Testileý rásiminiń ashyqtyǵy men adaldyǵyn qamtamasyz etý maqsatynda proktorıng júıesi qoldanylatynyn eske salamyz. Belgilengen talaptardy saqtamaý, onyń ishinde bógde adamdardyń kómegin paıdalaný, qashyqtan qol jetkizýge arnalǵan baǵdarlamalardy (AnyDesk, TeamViewer, DWService jáne t.b.) qoldaný, kamerany jáne/nemese mıkrofondy óshirý, smartfondardy, qulaqqaptardy jáne ózge de elektrondyq aqparat tasymaldaýshy qurylǵylardy paıdalaný, sondaı-aq test tapsyrmalaryn kez kelgen tásilmen kóshirý, testileý nátıjelerin joıý úshin negiz sanalady. Úmitkerler jeke kabınette ornalastyrylǵan «Sandyq aqparatpen jumys isteý qabiletin baǵalaý» testileýine arnalǵan nusqaýlyqtyń talaptarymen tolyǵyraq tanysa alady, - dep atap ótedi agenttikten.

Eske sala keteıik, buǵan deıin Prezıdenttik jastar kadr rezervine úmitkerlerdi bıyl qandaı synaq kútip turǵanyn jazǵan edik.