Prezıdenttik jastar kadr rezervine irikteýdiń 3 kezeńine jiberilgen kandıdattar belgili boldy

ASTANA. KAZINFORM – Prezıdenttik jastar kadr rezerviniń resmı saıtynda «Sıtýatsııalyq tapsyrmalardy sheshý» úshinshi kezeńine ótken kandıdattardyń tizimi jarııalandy.

Memlekettik qyzmet isteri agenttiginiń dereginshe, 2025 jylǵy 9-10 tamyzda ótken «Sandyq aqparatpen jumys isteý qabiletin baǵalaý» ekinshi testileý blogyna 2 597 kandıdat qatysty. Bekitilgen irikteý rásimine sáıkes, úshinshi kezeńge eń joǵary ball jınaǵan 600-den aspaıtyn kandıdat (onyń ishinde árbir salalyq baǵyt boıynsha 100-den aspaıtyn kandıdat) jiberiledi.

Birneshe kandıdatta teń nátıjeler bolǵan kezde irikteýdiń kelesi kezeńine kandıdattardyń kóbirek sany jiberilýi múmkin. Osylaısha, kelesi «Sıtýatsııalyq tapsyrmalardy sheshý» kezeńine eń joǵary nátıje kórsetken 683 kandıdat ótti.

Salalyq baǵyttar boıynsha ótý baly:

• «Agroónerkásiptik keshen jáne qorshaǵan ortany qorǵaý» – 13 ball;
• «Syrtqy saıasat jáne ınvestıtsııalar» – 16 ball;
• «Infraqurylymdy, ónerkásipti damytý jáne saýda saıasaty» – 
  20 ball;
• «Áleýmettik saıasat jáne azamattyq qoǵam» – 18 ball;
• «Tsıfrlandyrý» – 18 ball;
• «Ekonomıkalyq jáne qarjylyq saıasat» – 18 ball.

Kelesi kezeńge ótken tulǵalardyń tolyq tizimi pkrezerv.gov.kz resmı saıtynda ornalastyrylǵan.
«Sıtýatsııalyq tapsyrmalardy sheshý» kezeńi 2025 jylǵy 16 tamyzda ótedi. Bul kezeń memlekettik qyzmettiń ereksheligine tán praktıkalyq jaǵdaılardy oryndaý kezinde kandıdattyń basqarýshylyq sheshimder qabyldaý qabiletin baǵalaýǵa baǵyttalǵan.

Úshinshi kezeńge jiberilgen barlyq kandıdattar 2025 jylǵy 15 tamyzda saǵat 23:59-ǵa deıingi merzimde (Astana q. ýaqyty boıynsha) kezeńnen ótý úshin óziniń jeke kabınetinde tirkelýi qajet.

- Kezeńnen ótýdiń ashyqtyǵy men ádildigin qamtamasyz etý maqsatynda proktorıng júıesi qoldanylatynyn eske salamyz. Belgilengen talaptardy saqtamaý, onyń ishinde bógde adamdardyń kómegin paıdalaný, qashyqtan qol jetkizýge arnalǵan baǵdarlamalardy (AnyDesk, TeamViewer, DWService jáne t.b.) qoldaný, kamerany jáne/nemese mıkrofondy óshirý, smartfondardy, qulaqqaptardy jáne ózge de elektrondyq aqparat tasýshy qurylǵylardy paıdalaný, sondaı-aq test tapsyrmalaryn kez kelgen tásilmen kóshirý, testileý nátıjelerin joıý úshin negiz sanalady. Kandıdat jeke kabınette ornalastyrylǵan «Sıtýatsııalyq tapsyrmalardy sheshý» kezeńine arnalǵan nusqaýlyqtyń talaptarymen tolyǵyraq tanysa alady, - dedi agenttikten.

Aıta keteıik, Prezıdent bastamalaryna arnalǵan rezervti bólý qaǵıdalary jańartyldy.