Prezıdenttik jastar kadr rezervine kimder endi
ASTANA. KAZINFORM — Prezıdenttik jastar kadr rezervine tórtinshi irikteý aıaqtaldy. 24 qazanda Qazaqstan Respýblıkasy Prezıdentiniń janyndaǵy Jastar kadr rezervi jónindegi ulttyq komıssııanyń otyrysy ótti. Onyń qorytyndysy boıynsha 50 adam Prezıdenttik jastar kadr rezervine qabyldandy. Bul týraly Memlekettik qyzmet ister agenttigi málim etti.
Memlekettik qyzmet isteri agenttiginiń tóraǵasy Darhan Jazyqbaı Prezıdenttik jastar kadr rezervine tórtinshi irikteý qazan aıynyń sońynda aıaqtalǵanyn aıtty.
— Jobanyń negizgi maqsaty — memlekettik basqarý júıesine bilimdi, jaýapkershilikti jáne joǵary kásibı bilikti jastardy tartý. Nıet bildirgen 31 myńnan astam úmitkerdiń ishinen 7 436 adam irikteýge qatysýǵa jiberildi. Alty kezeńnen turatyn irikteý nátıjesinde rezervke 50 úzdik jas maman qabyldandy. Bir orynǵa 148 adamnan kelip, bul kórsetkish 2023 jylǵy irikteýmen salystyrǵanda 16%-ǵa joǵary boldy, — delingen habarlamada.
Agenttiktiń málimetinshe, tórtinshi irikteýdiń basty jańashyldyǵy — memlekettik apparat úshin asa suranysqa ıe salalyq baǵyttar boıynsha Rezervti qalyptastyrý boldy. Kandıdattar belgilengen kvotalarǵa sáıkes qabyldandy:
- «ınfraqurylymdy, ónerkásipti damytý jáne saýda saıasaty» baǵyty boıynsha — 8 adam;
- «agroónerkásiptik keshen jáne qorshaǵan ortany qorǵaý» baǵyty boıynsha — 9 adam;
- «syrtqy saıasat jáne ınvestıtsııalar» baǵyty boıynsha –
8 adam; - «ekonomıkalyq jáne qarjylyq saıasat» baǵyty boıynsha –
7 adam; - «tsıfrlandyrý» baǵyty boıynsha — 9 adam;
- «áleýmettik saıasat jáne azamattyq qoǵam» baǵyty boıynsha — 9 adam.
Jańadan qabyldanǵan rezervshilerdiń tolyq tizimin pkrezerv.gov.kz jobanyń resmı saıtynan kórýge bolady.
Rezervke alynǵan sátten bastap úsh jyl ishinde rezervshiler saıası memlekettik laýazymdarǵa, «A» korpýsynyń ákimshilik memlekettik laýazymdaryna, sondaı-aq «B» korpýsynyń basshylyq laýazymdaryna taǵaıyndalýy múmkin.
Aıta keteıik, buǵan deıin Prezıdenttik jastar kadr rezerviniń 1 ornyna 148 adam úmitker bolǵanyn jazǵan edik.