Prezıdenttik jastar kadr rezervine qyzyǵýshylyq artyp keledi – Darhan Jazyqbaı
ASTANA. KAZINFORM – Ótken jyly Prezıdenttik jastar kadr rezervine tórtinshi irikteý kezeńi ótkizildi. Nátıjesinde rezerv 6 baǵyt boıynsha 50 salalyq bilikti mamanmen tolyqty. Jobaǵa qyzyǵýshylyq artyp keledi.
Bul týraly Memlekettik qyzmet isteri agenttiginde 2025 jyldyń nátıjeleri boıynsha ótken keńeıtilgen alqa otyrysynda vedomstvo basshysy Darhan Jazyqbaı málim etti, dep habarlaıdy agentiktiń baspasóz qyzmeti.
Baspasóz qyzmetiniń málimetterine qaraǵanda, eger 2019 jyly Prezıdenttik jastar kadr rezervi baǵdarlamasyna 13 myń azamat qatysýǵa nıet bildirse, 2025 jyly bul kórsetkish 32 myńǵa jetti. Jalpy rezervke alynǵan 450 azamattyń 337-si búginde túrli salalarda eńbek etip jatyr.
- Óńirlik kadr rezervteri de naqty nátıje kórsetti. 538 rezervshiniń 260-y jańa laýazymdarǵa taǵaıyndalyp, olardyń 193-i jergilikti atqarýshy organdarda basshylyq qyzmetke ornalasty. Sonymen qatar, talanttardy tartýdyń ózge de tetikteri qoldanylyp jatyr. 735 úzdik túlek (GPA 3,33-ten tómen emes) konkýrstan tys aýyldyq jáne aýdandyq deńgeıdegi laýazymdarǵa qabyldandy. Agenttik 964 joǵary laýazymǵa konkýrssyz taǵaıyndaýdy kelisip, olardyń 19,5%-y kvazımemlekettik jáne jeke sektor ókilderi boldy, - dedi agenttik tóraǵasy.
Alqa otyrysynda Darhan Jazyqbaı 2025 jyl memlekettik qyzmet júıesi ınstıtýtsıonaldyq turǵydan jańǵyrtylǵan jyl bolǵanyn atap ótti.
2025 jyly memlekettik qyzmetti damytýdyń 2024-2029 jyldarǵa arnalǵan Tujyrymdamasyn júzege asyrý maqsatynda «Qazaqstan Respýblıkasynyń memlekettik qyzmeti týraly» jańa zań jobasy ázirlenip, jeltoqsan aıynda Parlament Májilisiniń qaraýyna engizildi.
Bul jańa zań jobasy qazirgideı tek eńbek qatynastaryn ıaǵnı, memlekettik qyzmetke kirý, ótkerý jáne ony toqtatý máselelerin retteýmen shektelmeı, eń bastysy memlekettik qyzmetshilerdiń minez-qulqynyń adamǵa baǵdarlanǵan úlgisin bekitýdi kózdeıdi.
Osyǵan deıin memlekettik qyzmetke irikteýdiń jańa avtomattandyrylǵan modeli tanystyrylǵan bolatyn.