Prezıdenttik jastar kadr rezervi: irikteýden ótkender qaıda jumys isteıdi

ASTANA. KAZINFORM — Prezıdenttik jastar kadr rezervi Qazaqstanda Memleket basshysynyń tapsyrmasymen 2019 jyldan beri júzege asyp keledi. Osy ýaqyt ishinde irikteý tórt ret ótkizildi — 2019, 2021, 2023 jáne 2025 jyldary.

Jobanyń negizgi maqsaty — talantty, bastamashyl jáne bilikti jastardy memlekettik basqarý júıesine tartý.

Memlekettik qyzmet isteri agenttiginiń málimetinshe, onlaın-platforma arqyly irikteýge qatysýǵa 97 myńnan astam azamat qyzyǵýshylyq bildirgen.

Іrikteý nátıjesinde 450 jas maman Prezıdenttik jastar kadr rezervine endi:

• 2019 jyly – 300 adam,

• 2021, 2023 jáne 2025 jyldary – árqaısysynda 50 adamnan.

Rezervke engen jastarǵa saıası memlekettik qyzmetke, «A» jáne «B» korpýstaryndaǵy basshylyq laýazymdarǵa taǵaıyndalý múmkindigi berildi.

Qazirgi tańda alǵashqy úsh legtiń 400 qatysýshysynyń 321-i (80,7%) memlekettik organdar men uıymdarda qyzmet atqaryp júr.

Olardyń arasynda:

• 38 adam – saıası laýazymdarǵa taǵaıyndalǵan;

• 5 rezervıst – «A» korpýsynyń qyzmetinde;

• 3 adam – Májilis depýtaty;

• 1 rezervıst – máslıhat depýtaty atanǵan.

Rezerv ókilderiniń arasynda:

• Ryspekov D.A. – Ulytaý oblysynyń ákimi;

• Nurpeıisov A.B. – Qazaqstan Respýblıkasy Prezıdenti Іs basqarýshysy;

• Spotkaı M.A. – Senat Apparatynyń basshysy;

• Baıel A.D. – Qazaqstannyń Ázerbaıjandaǵy Tótenshe jáne Ókiletti Elshisi;

• Adambekov T.S., Baıtelesov N.T., Mýtalı A. – Parlament Májilisiniń depýtattary.

Eske sala ketsek, tórtinshi irikteý 2025 jylǵy 24 qazanda aıaqtalyp, alty baǵyt boıynsha 50 jańa rezervısttiń tizimi jasaqtaldy.

Olar kelesi baǵyttardy qamtıdy:

• ınfraqurylym jáne ónerkásip,

• agroónerkásip kesheni men ekologııa,

• syrtqy saıasat pen ınvestıtsııalar,

• ekonomıkalyq jáne qarjylyq saıasat,

• tsıfrlandyrý,

• áleýmettik sala jáne azamattyq qoǵam.

Qazirgi ýaqytta Agenttik ortalyq jáne jergilikti atqarýshy organdarmen birlesip, jańa rezervısterdi jumysqa ornalastyrý jumystaryn bastady.

Eske sala keteıik, buǵan deıin Prezıdenttik jastar kadr rezervine kimder engenin jazǵan edik.