Prezıdenttik jastar kadr rezervi: 31 myń úmitkerdiń elýi qabyldandy

ASTANA. KAZINFORM – QR Prezıdenti janyndaǵy Jastar kadr rezervi jónindegi ulttyq komıssııa otyrysynda 50 adam Prezıdenttik jastar kadr rezervine qabyldandy.

Rezervke irikteý bıylǵy maýsym aıynan qazanǵa deıin júrgizilgen. Qujat qabyldaý kezeńinde jobanyń resmı saıtyna 31 859 adam tirkeldi, bul elimizdiń jas mamandary tarapynan jobaǵa degen joǵary qyzyǵýshylyqty kórsetedi. 

Tórtinshi irikteýdiń basty jańashyldyǵy – memlekettik apparat úshin asa suranysqa ıe salalyq baǵyttar boıynsha rezerv qalyptastyrý boldy. Kandıdattar belgilengen kvotalarǵa sáıkes qabyldanǵan:

• «ınfraqurylymdy, ónerkásipti damytý jáne saýda saıasaty» baǵyty boıynsha – 8 adam;
• «agroónerkásiptik keshen jáne qorshaǵan ortany qorǵaý» baǵyty boıynsha – 9 adam;
• «syrtqy saıasat jáne ınvestıtsııalar» baǵyty boıynsha – 8 adam;
• «ekonomıkalyq jáne qarjylyq saıasat» baǵyty boıynsha – 7 adam;
• «tsıfrlandyrý» baǵyty boıynsha – 9 adam;
• «áleýmettik saıasat jáne azamattyq qoǵam» baǵyty boıynsha – 9 adam.

Jańadan qabyldanǵan rezervshilerdiń tolyq tizimi pkrezerv.gov.kz jobanyń resmı saıtynda jarııalandy.

Bul mamandar rezervke alynǵan sátten bastap úsh jyl ishinde saıası memlekettik laýazymdarǵa, «A» korpýsynyń ákimshilik memlekettik laýazymdaryna, sondaı-aq «B» korpýsynyń basshylyq laýazymdaryna taǵaıyndalýy múmkin.

Buǵan deıin tórtinshi Prezıdenttik jastar kadr rezervine irikteýdiń talaby túsindirilgen edi.