Prezıdenttik saıabaqtyń trotýarynda kóligimen júrgen júrgizýshi qamaýǵa alyndy
ASTANA. KAZINFORM – Astanada Prezıdenttik saıabaq aýmaǵynda avtokólikpen jaıaý júrginshiler jolyna shyqqan azamat 10 táýlikke ákimshilik qamaýǵa alyndy.
Іs Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda qaraldy.
Sot málimetinshe, azamat B. túngi ýaqytta kólikpen Prezıdenttik saıabaq aýmaǵyndaǵy jaıaý júrginshilerge arnalǵan trotýarmen júrgen.
«Osy áreketi arqyly ol aınalasyndaǵylarǵa anyq qurmetsizdik tanytyp, azamattardyń ómiri men densaýlyǵyna qaýip tóndirip, qoǵamdyq tártipti buzǵan», – dep habarlady sot.
Keıin oqıǵanyń beınejazbasy áleýmettik jelilerde jarııalanyp, kópshilikke taraǵan.
Sot otyrysynda quqyq buzýshy kinásin tolyq moıyndap, trotýarǵa ádeıi shyqpaǵanyn jáne onda kólikpen júrýge tyıym salynǵanyn bilmegenin aıtqan. Sondaı-aq beınejazbany onyń tanysy túsirgenin málimdedi.
Budan bólek, azamat B. kólik quralyn basqarý quqyǵy bolmaı turyp jáne tıisti qujattarsyz kólik júrgizgeni úshin ÁQBtK-niń 612-babynyń 2-bóligi boıynsha da ákimshilik jaýapkershilikke tartylǵan.
«Sot quqyq buzýshylyqtyń qasaqana jáne kórsetip jasalǵanyn, onyń áleýmettik jeliler arqyly kópshilikke jarııalanǵanyn, sondaı-aq quqyq buzýshynyń buǵan deıin de birneshe ret ákimshilik jaýaptylyqqa tartylǵanyn eskerdi», – delingen habarlamada.
Nátıjesinde sot azamatqa 10 táýlik merzimge ákimshilik qamaqqa alý túrindegi jaza taǵaıyndady.
Qaýly zańdy kúshine engen joq.
Aıta keteıik, polıtsııa arnaıy reıd barysynda jalǵan nómir taqqan 500-den astam kólikti anyqtady.
