Prezıdenttik ortalyqta «Alǵashqy qońyraý» rásimi ótti
ASTANA. KAZINFORM – QR Prezıdenti Іs Basqarmasynyń Prezıdenttik ortalyǵynda elordanyń bolashaq birinshi synyp oqýshylary úshin Konstıtýtsııa jáne Bilim kúnine arnalǵan merekelik sabaq ótti.
Sharaǵa Astananyń №96 mektep-gımnazııasynyń 30-dan astam oqýshysy qatysty.
Merekelik sabaq otansúıgishtik, týǵan elge súıispenshilik sezimin qalyptastyrýǵa jáne tárıbeleýge, sondaı-aq balalardyń Qazaqstan týraly bilimderin jınaqtap-júıeleýge, respýblıkanyń memlekettik rámizderine degen qurmetti kózqarasty damytýǵa baǵyttalǵan.
«Balalar – bizdiń bolashaǵymyz. Bul týraly Prezıdentimiz de aıtyp júr. Konstıtýtsııada jazylǵandaı, elimizdiń eń negizgi baılyǵy – adam, onyń quqyqtary men bostandyǵyn qorǵaýǵa mindettimiz. Sondyqtan elimizdiń erteńi – jas búldirshinderge aq jol tileý maqsatynda búgingi sharany uıymdastyrdyq. Otanyn, elin, týǵan qalasyn súıýge baǵyttaıtyn balalar shyǵarmashylyǵyn uıymdastyrýda Prezıdenttik ortalyq pen elordalyq bilim ordalary arasynda jyldar boıǵy turaqty áriptestik qatynas ornaǵan», - dedi QR Prezıdenttik ortalyǵynyń dırektorynyń orynbasary Serik Sydyqov.
Bul rette Prezıdenttik ortalyq mýzeıin kez kelgen adam tegin tamashalaı alady. Ásirese, ortalyq mektep oqýshylary men qala qonaqtaryn asyǵa kútedi.
Merekelik sabaqqa qatysýshylar óz bilimderi men ónerin kórsetip, Qazaqstan týraly án shyrqap, horeografııalyq qoıylym kórsetti.
Sabaq sońynda búldirshinderge arnalǵan alǵashqy qońyraý soǵyldy, bul olardyń ómirindegi jańa jáne mańyzdy kezeńniń bastalýyn bildiredi.
Merekelik shara sońynda kishkentaı qatysýshylarǵa alǵashqy sabaqtan estelik retinde syılyqtar tabystalyp, gımnazııa ustazdaryna alǵys hattar berildi.
Aıta keteıik, elordalyq bilim basqarmasynyń málimetinshe, Astanada jalpy 187 mektep bar. Jańa 2024-2025 oqý jylynda elorda mektepterine 28 myńǵa jýyq bala qabyldanady.
