Nıý-Iork polıtsııasy Tramp korteji ótýine baılanysty Makronnyń kóligin ótkizbeı tastady

NЬıÝ-IORK. KAZINFORM — Nıý-Iork polıtsııasy prezıdent Donald Tramptyń kortejine baılanysty kóshelerdi jaýyp, Frantsııa prezıdenti Emmanıýel Makronnyń kóligin toqtatty, dep habarlaıdy Kazinform tilshisi.

Economic Times gazetiniń habarlaýynsha, oqıǵa Frantsııa kóshbasshysynyń BUU Bas Assambleıasynyń 80-sessııasynda sóz sóılegennen keıin boldy. Onda Makron Palestınany resmı túrde moıyndaǵanyn jarııalady.

Makron BUU shtab-páterinen shyǵyp, Frantsııa elshiligine barmaqshy bolǵan kezde onyń kóligin Tramptyń kortejiniń qaýipsizdigin qamtamasyz etetin Nıý-Iork polıtsııasynyń qyzmetkerleri toqtatty. Áleýmettik jelide keńinen taraǵan vıdeolardan ofıtserdiń Makronnan keshirim surap: «Keshirińiz, prezıdent myrza, qazir barlyq jer jabyq» dep jatqanyn kórýge bolady.

Frantsýz kóshbasshysy kóliginen túsip, Trampqa telefon soqty.

— Senesiń be, barlyq jer jabyq, sol sebepti men kóshede turmyn, — dep ázildedi Makron telefon arqyly.

Tramp kortejiniń ótýi aıaqtalǵanymen, jol tek jaıaý júrginshilerge ǵana ashyldy, bul Makrondy kelesi mejeli jerge jaıaý barýǵa májbúr etti.

Esterińizge sala keteıik, Emmanıýel Makron dúısenbi kúni BUU Bas assambleıasynda Palestınany resmı túrde moıyndady.