Prezıdenttik arnaýly ádebı syılyqqa ótinim qabyldaý 30 maýsymǵa deıin jalǵasady

ASTANA. KAZINFORM – Bıyl jas qalamgerlerge memlekettik qoldaý kórsetý, daryndy aqyn-jazýshylardyń jańa býynyn qalyptastyrý maqsatynda úshinshi ret Prezıdenttik arnaýly ádebı syılyq taǵaıyndalady.

Mádenıet jáne aqparat mınıstrligi málimetinshe, ádebı syılyqqa 18-35 jasqa deıingi qalamgerler buryn halyqaralyq jáne ulttyq baıqaýlarǵa qatyspaǵan týyndylarymen úmitker bola alady. Ótinim «Proza», «Poezııa», «Dramatýrgııa» jáne «Balalar ádebıeti» nomınatsııalary boıynsha qabyldanady. Avtor tek bir nomınatsııaǵa ǵana qatysa alady.

Syılyq ıegerlerine «Qazaqstandyq jas jazýshylar men aqyndar úshin Prezıdenttik arnaýly ádebı syılyqtyń laýreaty» ataǵy beriledi. Sondaı-aq dıplom, tósbelgi jáne 4,1 mln teńge kóleminde qarjylaı syıaqymen marapattalady.

Ótinimdi 2025 jyldyń 30 maýsymyna deıin qaǵaz jáne elektrondy túrde myna mekenjaı boıynsha joldaý qajet: Astana qalasy, Máńgilik el dańǵyly, 8, 14 kireberis, QR MAM Arhıv, qujattama jáne kitap isi komıteti, 273 kabınet.

Buǵan deıin Prezıdenttik jastar kadr rezervine irikteý bastalǵanyn jazǵan bolatynbyz.