Prezıdenttik arnaýly ádebı syılyq jeńimpazdary anyqtaldy
ASTANA. KAZINFORM – Búgin Ulttyq mýzeıinde Mádenıet jáne aqparat mınıstri Aıda Balaevanyń qatysýymen 2024 jylǵy jastarǵa arnalǵan Prezıdenttik arnaýly ádebı syılyq jeńimpazdaryn marapattaý rásimi ótti.

Jıynda Mádenıet jáne aqparat mınıstrligi men Qazaqstan Jazýshýylar odaǵynyń strategııalyq áriptestigi aıasynda «Qazaqstannyń ádebı-tanymdyq panoramasy» jobasymen jaryq kórgen 20 jas qalamgerdiń kitaptarynyń tusaýkeseri ótti.
Іs-sharaǵa zııaly qaýym ókilderi jáne mınıstrlik janynan qurylǵan «Alqa» jastar ádebı klýbynyń músheleri qatysty.

- Jas qazaqstandyq jazýshylar men aqyndarǵa arnalǵan Prezıdenttik ádebı syılyq 2023 jyly Prezıdent Jarlyǵymen taǵaıyndalyp, otandyq ádebıet álemindegi mańyzdy oqıǵalardyń birine aınaldy. Bul – Memleket basshysynyń mádenıet salasyn júıeli túrde jańǵyrtýǵa baǵyttalǵan bastamalarynyń biri. Bul syılyqtyń basty maqsaty – shyǵarmashyl jastardy qoldaý, jańa týyndylardyń jaryq kórýine jol ashý. Memleket basshysynyń mádenıet pen ónerdi damytýǵa erekshe mán berýi – onyń ustanyp otyrǵan reformalary men bastamalarynyń zańdy jalǵasy. Óıtkeni mádenıetti, ádebıetti damytý – jas urpaqtyń jan-jaqty damýynyń negizgi tetikteriniń biri. Al rýhanı turǵydan kemeldengen, bilimdi, eńbeksúıgish ári patrıot azamattardan quralǵan qoǵamda Zań men Tártip ústemdik qurady, adamdar óz áreketteri úshin jaýapkershilik alady, dástúrge qurmetpen qarap, ulttyń negizgi qundylyqtaryn ardaqtaıdy, – dedi Aıda Balaeva.

Mınıstr halqymyzdyń negizgi qundylyqtaryn nasıhattaý – ádebıet qaıratkerlerine júkteler aýyr ári mártebeli mindet ekenin atap ótti. Sondaı-aq, aqyn-jazýshylar qoǵamnyń moraldyq baǵyt-baǵdaryn aıqyndaıtyn rýhanı kóshbasshylar ekenine toqtaldy.
- Sizder óz zamandaryńyzdyń beınesin jańasha jazyp, jańa kózqaras qalyptastyrýǵa tıissizder. Uly qalamgerlerdiń jolyn jalǵastyryp qana qoımaı, ádebıetti jańa beleske kóterý – sizderdiń qoldaryńyzda. 20 ǵasyrdaǵy ádebıet adamnyń jan álemin tereńnen sýrettese, 21 ǵasyrdyń qalamgerleri jańa tehnologııalar dáýirindegi adam taǵdyry, jahandaný men ulttyq bolmys, jeke tulǵanyń kúresi sekildi taqyryptarǵa qalam terbeýi kerek, – dedi Aıda Balaeva.
Basqosýda búgingi ádebı tendentsııalar men ózekti máseleler talqylanyp, túrli usynys-pikirler kóterildi.

Qazaqstandyq jas jazýshylar men aqyndar úshin Prezıdenttik arnaýly ádebı syılyǵy «Proza» nomınatsııasy boıynsha «2026» shyǵarmasy úshin Esbol Sotsıalhanǵa, «Poezııa» nomınatsııasy boıynsha «Boz ushqat» óleńder jınaǵy úshin Jánibek Baqytuly Álımanovqa, «Dramatýrgııa» nomınatsııasy boıynsha «Apataı» dramalyq týyndysy úshin Álısher Jeńisuly Aıtýarǵa, «Balalar ádebıeti» nomınatsııasy boıynsha «Roket Era» povesi úshin Áset Júkenuly Syzdyqovqa berildi.
Ádebı syılyqqa 18-35 jas aralyǵyndaǵy qalamgerler buryn halyqaralyq jáne ulttyq baıqaýlarǵa qatyspaǵan týyndylarymen qatysty.

Aıta ketsek, jas qalamgerler shyǵarmashylyǵyn qoldaý únemi nazarda. Ótken jyly Prezıdenttiń Ulttyq quryltaıdaǵy tapsyrmasyna sáıkes, 23 sáýir – Ulttyq kitap kúni bolyp bekitildi. Soǵan oraı «Ulttyq kitap» baıqaýy jarııalandy.
Sondaı-aq, Mádenıet jáne aqparat mınıstrligi Qazaqstan jazýshylar odaǵymen «Strategııalyq áriptestik» ornatý boıynsha 3 jańa joba júzge asyrǵan bolatyn.
Atap aıtqanda, jas qalamgerler «Qazaqstannyń ádebı-tanymdyq panoramasy» jobasy negizinde elimizdiń ár qıyryn aralap, jańa shyǵarmalar jazdy. Joba nátıjesinde jyl sońyna deıin qazaq ádebıetine 20 jańa týyndy qosylyp, ár jas qalamgerge 4 mln teńge kóleminde qalamaqy taǵaıyndaldy.
Budan bólek, 2025 jyl – «Jumysshy mamandyqtary jyly». Osy oraıda, eńbek mamandyqtarynyń mańyzyn ashý maqsattynda «Erlik pen eńbek dastany» baıqaýy ótkiziledi.
Sonymen qatar, «Aıboz» ulttyq ádebı syılyǵy jalǵasyn taýyp keledi. Byltyr Ulttyq syılyqqa 7 nomınatsııa boıynsha buryn-sońdy esh jerde jarııalanbaǵan 176 týyndynyń qujaty qabyldandy.
Eske salsaq Ádebıet pen óner qaıratkerlerine mádenıet salasyndaǵy memlekettik stıpendııa tapsyrylǵan edi.