Prezıdenttiń Jańa Qazaqstandy qurý bastamasy – sheteldik saıasatkerler nazarynda

NUR-SULTAN. QazAqparat – Syrtqy ister mınıstri Muhtar Tileýberdi Eýropalyq Parlament delegatsııasy ókilderimen kezdesti. Taraptar basqosýynda sheteldik depýtattar Memleket basshysy Qasym-Jomart Toqaevtyń Jańa Qazaqstandy qurý jónindegi bastamalaryn únemi baqylap otyratynyn málimdedi, dep habarlaıdy QazAqparat tilshisi.

«Eýroparlament delegatsııasynyń elimizge kelýi - Qazaqstan men Eýroodaq arasyndaǵy saıası jáne parlamentaralyq yntymaqtastyqty nyǵaıtýǵa jáne jańa perspektıva izdeýge qosymsha serpin berýi tıis», - dedi Muhtar Tileýberdi.

Eýropalyq Parlament ókilderi Prezıdenttiń Konstıtýtsııaǵa túzetýler engizý jáne Jańa Qazaqstandy qurý jónindegi bastamalaryn únemi baqylap otyratynyn jetkizdi.

«Eýropalyq Parlament Qazaqstan Eýropalyq Odaqtyń negizgi seriktesi bolyp tabylatyn Ortalyq Azııa elderiniń damýyn muqııat qadaǵalaıdy», - dep atap ótti sheteldik delegatsııa músheleri.

Sapar aıasynda Eýropalyq Parlament depýtattary QR Parlamenti Májilisi, Bas prokýratýra, Sybaılas jemqorlyqqa qarsy is-qımyl agenttigi jáne birneshe mınıstrlik basshylarymen kezdesýler ótkizedi.