Prezıdenttiń Vetnamǵa resmı sapary týraly birlesken kommıýnıke jarııalandy
1. Qazaqstan Respýblıkasynyń Prezıdenti Qasym-Jomart Toqaev Vetnam Sotsıalıstik Respýblıkasynyń Prezıdenti Vo Van Thyongtyń shaqyrýyna oraı 2023 jylǵy 20-22 tamyz aralyǵynda Vetnamǵa resmı saparmen bardy.
2. Sapar aıasynda Prezıdent Qasym-Jomart Toqaev VKP OK-nyń Bas hatshysy Ngýen Fý Chongpen kezdesti, Prezıdent Vo Van Thyongpen, Premer-Mınıstr Fam Mın Chınmen jáne Ulttyq jınalys Tóraǵasy Vyong Dın Hıýemen kelissózder júrgizdi, sondaı-aq Baknın jáne Haızyong provıntsııalaryndaǵy birqatar ekonomıkalyq jáne mádenı nysandardy aralady.
3. Sapar barysynda taraptar saıası, saýda-ekonomıkalyq, ınvestıtsııalyq, kólik-logıstıkalyq, mádenı jáne týrıstik salalardaǵy yntymaqtastyqty damytý sharalary týraly, sondaı-aq halyqaralyq jáne óńirlik kún tártibiniń ózara qyzyǵýshylyq týdyratyn ózekti máseleleri boıynsha jan-jaqty pikir almasty.
4. Kelissózder barysynda Prezıdent Qasym-Jomart Toqaev pen Prezıdent Vo Van Thyong Qazaqstan men Vetnamdy dástúrli dostyq qarym-qatynastar baılanystyratynyn rastady. Taraptar sońǵy kezderi ekijaqty qatynastardaǵy ilgerileýshilikke qanaǵattanýshylyq bildirip, qalyptasqan ózara senimdi saıası dıalogty erekshe atap ótti.
Qazaqstan men Vetnam arasyndaǵy yntymaqtastyq ózara tıimdi is-qımyl jasaý úshin joǵary áleýeti bar jańa salalardy qosa alǵanda, ózara múddelilikti bildiretin barlyq baǵyttar boıynsha keńeıip jatqany basa aıtyldy.
Memleket basshylary barlyq deńgeılerde, onyń ishinde eki eldiń partııalary, úkimetteri jáne parlamentteri jelisi boıynsha delegatsııalar almasýdy, sondaı-aq halyqtar arasyndaǵy mádenı baılanystardy jandandyrý; ózara túsinistik pen senimdi nyǵaıtý, sondaı-aq ekijaqty san salaly ózara is-qımyldy keńeıtý maqsatynda Úkimetaralyq komıssııa, saıası konsýltatsııalar men basqa da formattar sııaqty qoldanystaǵy yntymaqtastyq tetikterin tıimdi túrde iske qosý nıetin rastady.
5. Prezıdentter saýda-ekonomıkalyq yntymaqtastyqty damytýdyń mańyzdylyǵyn atap ótti, bıznestiń eki eldiń naryqtaryna ózara qol jetkizýi úshin qolaıly jaǵdaılar jasaý jáne ózara paıdaly saýdany qamtamasyz etýdiń tıimdi tetikterin, onyń ishinde Qazaqstannan Vetnamǵa jáne keri qaraı konteınerlik tasymaldardy ulǵaıtý úshin sharalar qabyldaý maqsatynda qoldaný múmkindigin qarastyrý nıetin rastady.
Taraptar týrızm, aqparattyq tehnologııalar, aýyl sharýashylyǵy, kólik jáne logıstıka sııaqty jáne basqa da áleýetti yntymaqtastyq baǵyttaryn talqylady.
6. Memleket basshylary Qazaqstan men Vetnam arasyndaǵy saýdanyń ósýine yqpal etetin Vetnam Sotsıalıstik Respýblıkasy men Eýrazııalyq ekonomıkalyq odaq arasyndaǵy erkin saýda týraly kelisimdi iske asyrýdyń oń nátıjelerin joǵary baǵalady. Taraptar ekijaqty saýdany odan ári ilgeriletý úshin osy Kelisimniń artyqshylyqtaryn paıdalanýǵa daıyn ekendigin bildirdi.
7. Prezıdentter 2022 jylǵy qazanda Qazaqstan Respýblıkasy men Vetnam Sotsıalıstik Respýblıkasy arasynda tikeleı áýe qatynasynyń ashylýy eki el arasyndaǵy saýda-ekonomıkalyq, ınvestıtsııalyq, týrıstik jáne mádenı yntymaqtastyqtyń damýyn yntalandyrýǵa qolaıly jaǵdaılar jasaǵanyn qanaǵattanýshylyqpen atap ótti.
8. Memleket basshylary 2009 jylǵy 15 qyrkúıektegi Qazaqstan Respýblıkasynyń Úkimeti men Vetnam Sotsıalıstik Respýblıkasynyń Úkimeti arasyndaǵy bilim berý salasyndaǵy yntymaqtastyq týraly kelisimge tolyqtyrý engizý týraly 2017 jylǵy 3 qańtardaǵy hattamanyń negizinde bilim berý salasyndaǵy yntymaqtastyqty jandandyrýǵa qyzyǵýshylyq bildirdi.
9. Prezıdentter mádenı-gýmanıtarlyq baılanystardy jandandyrýdyń, onyń ishinde eki halyqty jumyldyrý jáne ózara túsinistikti tereńdetý, mádenıetterdi birlesip baıytý jáne ekijaqty qatynastardy tutas damytý maqsatynda ǵylym, sport jáne densaýlyq saqtaý salasyndaǵy yntymaqtastyq pen almasýdy keńeıtýdiń mańyzdylyǵyn rastady.
10. Memleket basshylary halyqaralyq uıymdar men forýmdar sheńberinde júzege asyrylyp jatqan eki eldiń tyǵyz úılesimi men ózara qoldaýyn joǵary baǵalady. Taraptar óńirdegi beıbitshilik, damý men órkendeý turǵysynan múshe memleketter arasyndaǵy yntymaqtastyqty nyǵaıtý maqsatynda kópjaqty forýmdarda, atap aıtqanda Azııadaǵy ózara is-qımyl jáne senim sharalary jónindegi keńes (AÓSShK) sheńberinde yntymaqtastyqty odan ári órbitýge umtylysyn atap ótti.
Vetnam tarapy ASEAN jáne Ońtústik-Shyǵys Azııa elderimen yntymaqtastyqty nyǵaıtýda baılanystyrýshy býyn bolyp, Qazaqstandy qoldaýǵa daıyn ekenin bildirdi.
Taraptar halyqaralyq jáne óńirlik máseleler týraly pikir almasty. Vetnam tarapy Ońtústik Qytaı teńizdegi qazirgi jaǵdaı týraly habardar etti. Taraptar beıbitshilikti, qaýipsizdik pen turaqtylyqty saqtaýdyń, sondaı-aq halyqaralyq quqyq pen BUU Jarǵysy negizinde barlyq daýlardy beıbit jolmen sheshýdiń mańyzdylyǵyn atap ótti.
11. Sapar sheńberinde mynadaı qujattarǵa: (1) Qazaqstan Respýblıkasy men Vetnam Sotsıalıstik Respýblıkasy arasyndaǵy sottalǵan adamdardy berý týraly shartqa; (2) Qazaqstan Respýblıkasynyń Úkimeti men Vetnam Sotsıalıstik Respýblıkasynyń Úkimeti arasyndaǵy ulttyq pasporttardyń ıelerin vızalyq talaptardan ózara bosatý týraly kelisimge; (3) Qazaqstan Respýblıkasynyń Úkimeti men Vetnam Sotsıalıstik Respýblıkasynyń Úkimeti arasyndaǵy 2023–2025 jyldarda saýda-ekonomıkalyq yntymaqtastyqty jedel damytý jónindegi birlesken is-qımyl josparyna; (4) Qazaqstan Respýblıkasynyń Mádenıet jáne sport mınıstrligi men Vetnam Sotsıalıstik Respýblıkasynyń Mádenıet, sport jáne týrızm mınıstrligi arasyndaǵy týrızm salasyndaǵy yntymaqtastyq týraly memorandýmǵa; (5) Qazaqstan Respýblıkasy Syrtqy ister mınıstrliginiń Investıtsııalar komıteti men Vetnam Sotsıalıstik Respýblıkasynyń Investıtsııalar jónindegi agenttigi arasyndaǵy yntymaqtastyq týraly memorandýmǵa; (6) «QazTrade» caýda saıasatyn damytý ortalyǵy» AQ men «VietTrade» Vetnamnyń saýdaǵa járdemdesý jónindegi agenttigi arasyndaǵy yntymaqtastyq týraly memorandýmǵa; (7) «Habar» agenttigi» AQ men «Vietnam Television» arasyndaǵy ózara túsinistik týraly memorandýmǵa qol qoıyldy.
12. Qazaqstan Respýblıkasynyń Prezıdenti Qasym-Jomart Toqaev Vetnam Sotsıalıstik Respýblıkasynyń Prezıdenti Vo Van Thyong pen Vetnam halqyna jyly shyraıly qonaqjaılylyǵy úshin shynaıy rızashylyǵyn bildirdi. Prezıdent Qasym-Jomart Toqaev Prezıdent Vo Van Thyongty ózine yńǵaıly ýaqytta Qazaqstanǵa kelýge shaqyrdy. Prezıdent Vo Van Thyong shaqyrýdy rızashylyqpen qabyldady. Sapar merzimi dıplomatııalyq arnalar arqyly kelisiletin bolady.
