Prezıdenttiń úndeýi qoǵam men memlekettiń aldyndaǵy kóptegen saýaldarǵa jaýap berdi - sarapshy
«Biz Memleket basshysynyń úndeýin tyńǵylyqty tyńdap shyqtyq. Biz naqty saıası reformalardyń qarsańynda turmyz. Parlamenttiń róli eleýli túrde artpaq»,- dedi Erlan Saırov.
Al óz kezeginde saıasattanýshy Berik Ábdiǵalıuly búginde álemde ózgerister bolyp jatqandyǵyn jáne Qazaqstanda da tıisti ózgerister oryn alatynyn atap ótti.
«Búginde ıkemdirek, úılestirilgen basqarý júıesi kerek. Bul jaıynda Memleket basshysy qadap aıtty. Osy oraıda Parlamenttiń, Úkimettiń jaýapkershiligin naqty kóterý jaıynda Prezıdenttiń úndeýi óte oryndy boldy. Qazaqstan halqy aldynda jaýapkershilik artady, ıaǵnı Úkimet halyq aldynda eldiń áleýmettik-ekonomıkalyq damýy úshin jaýapty bolady. Aldaǵy ýaqytta Parlament óziniń keńeıtilgen ókilettigimen halyq qalaýyn jetkizýshi retinde Úkimettiń sheshimderin qadaǵalaýy tıis»,-dedi ol.
Munymen qosa, Bolat Baıqadamov Prezıdenttiń búgingi úndeýi qoǵamnyń, memlekettiń aldynda turǵan kóptegen saýaldarǵa jaýap bergenin atap ótti. Osy rette bılik tarmaqtary arasynda tıisti teńgerimdi júrgizý eskerilip otyrǵandyǵyn jetkizdi.
Budan buryn habarlanǵandaı, úndeý barysynda Elbasy Nursultan Nazarbaev Qazaqstanda Úkimetti jasaqtaýda Parlamenttiń róli kúsheıtiletinin málim etti.
«Qazir zamannyń dıdary ózgerdi. Biz de ózgerýge tıispiz. Sol sebepti memlekettiń basqarý júıesin de jańǵyrtatyn kez keldi. Men eldiń múddesi men zamannyń talabyn, urpaqtyń bolashaǵyn oılaı otyryp osyndaı baılam jasadym. Arnaıy qurylǵan jumys toby atqarylǵan isterdi baıandady. Reforma eki negizgi baǵyt boıynsha iske asady. Birinshiden, Prezıdenttiń áleýmettik-ekonomıkalyq protsesterdi retteýdegi birshama ókiletterin Úkimetke jáne basqa da atqarýshy organdarǵa bergen jón dep sanadym», - dedi QR Prezıdenti.
