Prezıdenttiń uly Qurandy jatqa oqıdy
ASTANA. 8 jeltoqsan. QazAqparat - Sheshenstan Prezıdentiniń uly, 6 jastaǵy Adam Qadyrov Qurandy jatqa biletin Reseıdegi eń jas hafız atandy. Qasıetti kitaptaǵy 114 súreni toqtaýsyz aıtyp shyqqan balanyń bulqadamyna Ramzan Qadyrov shattana qýanyp, óziniń áleýmettik jelisinde kóńil kúıi men kózqarasyn bildiripti.
Bul týraly "Aıqyn" gazeti keshegi senbilik sanynda jazyp otyr.
- Búgingi kúndi erekshe qýanyshpen qarsy aldym. Allanyń bergeni arqasynda Reseı batyry, Sheshenstannyń tuńǵysh prezıdenti, eldiń damýy men turaqtylyǵyna zor úles qosqan Ahmat qajy Qadyrovtyń nemeresi, alty jasar Adam taǵy da atymyzdy shyǵardy. Árıne, oǵan ońaı bolǵan joq, áli de jaza da, oqı da bilmeıtin jas bala, biraq bul synaqtan qınalmaı ótti. Men aldymen tálimgerlerge alǵysymdy bildirgim keledi. Adam Sheshenstanda ǵana emes, Reseı aýmaǵyndaǵy eń jas hafız atandy. Bizdiń úıge nuryn tókkeni úshin Alla taǵalaǵa myń márte alǵysymdy aıtamyn", - deıdi Ramzan Qadyrov.
Aqıqatyna kelsek, Qurandy jatqa oqý Qadyrovtar otbasynyń qundylyǵyna aınalǵan. Osydan birer jyl buryn Sheshenstan prezıdentiniń qyzy Aıshat Qadyrova Qurannyń búkil súrelerin jatqa aıtyp, hafız atynǵany belgili. Ol 14 jasynda ekinshi hafız atandy. Odan buryn prezıdenttiń týysqany Hamzat Qadyrov halyqaralyq emtıhan tapsyryp, synaqtan súrinbeı ótti. Ramzan Qadyrovtyń kishi qyzy Hýtamat ta qasıetti Quran kitabyn oqıdy, súrelerdi jatqa oqýdan respýblıkalyq baıqaýdyń júldegeri atanǵan.
2012 jyly qajylyqqa baryp qaıtqan sátinde Ramzan Qadyrov Alladan kishi ulynyń synaqtan súrinbeı ótýin tilegenin aıtqan. Endi mine, aq tilek oryndalyp, kishi uly Reseıdegi eń jas hafız atandy.
