Prezıdenttiń tikeleı jeli arqyly halyqpen suhbat qurýy qoǵamda qordalanǵan máselelerdiń kóptigin kórsetti - Ekonomıka ınstıtýtynyń dırektory
Y. Qarashanyń 16-sy. QazAqparat /Erlik Erjanuly/ - Qoǵamda sheshýin kútken máseleler áli jetkilikti. Bul Elbasynyń halyqpen tikeleı jeli arqyly suhbat qurýy kezinde aıqyn ańǵaryldy,
deıdi QazAqparat tilshisine suhbat bergen Ekonomıka ınstıtýtynyń dırektory Orazaly Sábden.
«QR Prezıdentiniń halyqpen suhbat júrgizýi óte qajetti sharanyń biri boldy. Bizde problema óte kóp. Ony sheshetin - Úkimet. Alaıda olar dármensizdik kórsetip otyr. Suhbat kezinde olarǵa Prezıdenttiń tikeleı tapsyrmalar berip, onyń qortyndysyn málimdeýdi tapsyrýy sonyń aıqyn kórinisi», deıdi Bilim jáne ǵylym mınıstrligine qarasty Ekonomıka ınstıtýtynyń dırektory, ekonomıka ǵylymynyń doktory Orazaly Sábden. Qazaqstan ǵalymdary odaǵy prezıdentiniń aıtýynsha, jyl saıyn kóktemgi egis jumystary men kúzgi jıyn-terin kezinde janar-jaǵarmaı baǵasynyń qymbattaýy qazir úırenshikti jáıtke aınaldy. Úkimet ony bilse de naqty sharalar jasaýda dármensizdik tanytyp kele jatyr. «Máselen, keshe Premer-mınıstr janar-jaǵar maı máselesine qatysty Prezıdent tapsyrmasyn ákimshilik jolmen sheshetinderin málimdedi. Bul tyǵyryqtan shyǵarar jalǵyz jol emes. Ákimshilik pen naryqtyq tetikter qatar júrgizilýi kerek. Onsyz ahýaldy túbegeıli ózgertý qıyn. Kez-kelgen másele ǵylymı negizdegi júıeli baǵdarlamamen ǵana sheshiledi. Onsyz jasalǵan árekettiń bári tek ýaqytsha shara bop qalady», deıdi ol.
